الوجيه البيض طلقين الفعايل

يا مساء الخير يا نجد العذيه
والفرح والنور وورود الخمايل
ويا صباح المكرمه والمرحميه
وضامرات النوق والخيل الاصايل
وصادق احساس القلوب اللي نقيه
بالولا معه الغلا اللي له دلايل
يا قدوم اللي عسى رب البريه
يحتميهم من ملمات وغوايل
سيدي سلطان جزال العطيه
وسيدي سلمان ميزان الثقايل
الصقور اللي مواكرهم عليه
وفي هدايدهم كسايبهم جلايل
فمرحبا عد المزون العقربيه
ما تقافت برق ورعود وهمايل
ويا هلا مليون ترحيب وتحيه
يا الوجيه البيض طلقين الفعايل
مملكتنا اليوم بنت(ن) يعربيه
ضامرة سرجوف مسكية جدايل
تحمد الله بالغداة وبالعشيه
يوم اهلها عودوا عقب الرحايل
وجرت (ا) حداها وترقص سامريه
ما غشاها الخوف طربانه تمايل
بنت حكام(ن) بهم زوم وحميه
وفي يمانيهم مصاقيل وفتايل
يكرمون الضيف يعطون الحذيه
يحتمون الجار يشفون الغلايل
ينصرون الحق ينسون الخطيه
ويحكمون بشرع علام الخلايل
فيا عظيم الشان يا منجي نبيه
وسط بطن الحوت من ذيك الهوايل
لا تعوق بشر مزبان الونيه
خادم البيتين واشفه خير قايل
ونسالك تحفظ كريمين السجيه
للوطن واهله وجعل الباس زايل
حصة العتيبية