فقيد الوطن في عيون الشعراء

خيرٍ لصدقائه وشر للانذال
كم واحدٍ حمله ثقيلٍ وشاله
زاحه عنه لوكان مهوب ينشال
اسعد حياته عقب ما ضاق باله
وخلا الهموم تزول والضيم ينزال
ينفق على المحتاج من حر ماله
سلطان خير اسمه وياصدق ما قال
حلحيل ما تمشي عليه الحياله
حلحيل حلال وللحبل فتال
من كثر طيبه ضاري بالجزاله
بيته لمن ينصاه مزبن ومدهالٍ
شديد الرياحي
سلطان سلطان المواقف والمكارم والرجال
عز الشعوب المسلمة سلطان شعبه وبلده
سلطان أبو خالد ولد عبد العزيز أبو الثقال
عبد العزيز الفيصلي والفعل محدٍ يجحده
فعله يفوق الشرح والتوصيف والواقع يقال
محدٍ يحل العقد لاداره بفكره وعقده
دحيم النومسي
طليق حجاجه خف نفسه يشوفها
جليسه بوجه بسمته ما تزايله
حميد السجايا راعي الجود والوفي
ملاذ الضعيف اللي قسى الوقت غايله
جميع المراجل حاشها واتصف بها
على كل منحى طيب تكمل كمايله
سماحه وطيب وعز نفسٍ يصونها
عفاف وتقى في نور وجه دلايله
يتامى وأرامل في جنابه غدا لهم
ولي يعول اللي شكى فقد عايله
بقصرٍ تجيه الناس من كل منطقة
عن قاصده مافيه حجاب حايله
مشرّع الأبواب من يوم شيده
يلقى به الترحيب من كان جايله
حليف الندا ليث الوغى مرهب العدا
اليا كبرت الأخطار كبرت صمايله
أبا الجود به ميزات يندر مثيلها
مثل الحيا تتبع تواليه اوايله
وافي مثل أبو خالد بفضله وميزته
يشح الزمان ولا يجود بمثايله
ماجد نايف العشاي العتيبي
المجد يشهد لك على مر الأزمان
قايد كريم بفضل جودك رغدنا
بسمك تغنى مجدنا أعذب الحان
في مثل طيبك لا حشى ما وجدنا
يا كم بذلت الخير بدروب الاحسان
الجود من يمناك خيره وردنا
كفك غدا للعز والطيب عنوان
حكيم من رايك كثير استفدنا
انت الوفا انت العطا انت الانسان
انت الشجاع اللي بسيفه صمدنا
عنود نجد
يا طيب السيرة بطبعك ومبداك
سمح القبال ولك فعول ودلايل
يا الفيصلي يا المقرني ياولد ذاك
اللي حكمها بالسيوف الصقايل
عبدالعزيز اللي حكم نجد سماك
سلطان عز الدين ضد النكايل
للخير خير ولاهل الشر سفاك
حامي وطنا بالدروع الثقايل
قايد اسطول الجيش للأرض دكاك
لا ولّعت للحرب نار الفتايل
لك موقفٍ يشهد به اصحاب واعداك
دون الوطن ضد العقول الغلايل
وطبع الكرم يا سيدي من مزاياك
كريم عايش في كرمكم قبايل
يا مقدم البيضا على كف يمناك
مدات جودك من خيار العدايل
سعد هذيل الفريدي