حلول الغز

نشرنا في عدد الاسبوع الماضي لغزاً كتبه الشاعر فاروق الكسر وكان نصه:
أبا أنشد الشعار وأهل الفطنه
وكلّ على قدره.. وقدر امكانه
ياويش رجالٍ يده في بطنه
يجلي العماس الى سمعت الحانه
وكعادة قراء الجزيرة وصلتنا عشرات الحلول وبعد الفرز اكتملت شروط النشر في الحلول التالية:
النجر لامنا سمعنا رطنه
يبري هجوس القلب عقب أشجانه
ماجا ببطنه راح مثل القطنه
ولأهل الكرم والكيف ما أعظم شانه
محمد بن عبيد العصيمي / الرياض
يامرحبا باللي عرفنا رطنه
إعداد من زار الحرم واركانه
والسوق مايشبه حريره قطنه
والنجر ماتشبه له الطحانه
حميد مسفر الحويماني /البجادية
اللي يبا يرطن نترجم رطنه
وكلٍ على قدره رجح ميزانه
لغز الكسر عنه العرب مشتطنه
والنجر حله واضحٍ عنوانه
ضويان الحسيني الحمادي/ عرجاء
قريت لغزك وافتهمت إِلْرطنه
بحره قصير لابغيت أوزانه
الحل واضح لاجمعت الفطنه
«النجر» الأصفر زاهياتْ الوانه
علي رشيد الرشيد / رياض الخبراء
يا كاتب لغزٍ عرفنا رطنه
الطيف نعرف لمعته وألوانه
الناس في دنيا الشقا منشطنه
كم واحدٍ «نجره» يزيل أحزانه
مشاري خالد الدعجاني / شقراء
ياشاعر فيه الذكاء والفطنه
اللغز واضح بينه بيبانه
هذا النجر كل الحلا في رطنه
دقه سنافي والكرم عنوانه
محمد بن عبدالعزيز الخنيفر / أشيقر
لن كان لغزك يالكسر من شطنه
فانا جوابي يالكسر عنوانه
الشاش ماينفع بدون القطنه
النجر يازينه وزين ألوانه
أحمد بن شراع الذيابي / أم الدوم
حكيم يالشاعر وعندك فطنه
اسلوب طرحك واضحٍ عنوانه
والنجر لاحطيت بن ببطنه
يسمعك لامسكت يده الحانه
هدباء بنت فهاد بن رمقان / الرياض
الناس كل لاهيٍ في شطنه
سبحان خلاق البشر سبحانه
ومن لايفرق بين صوف وقطنه
النجر عنده يرخص اثمانه
عبدالهادي العرجاني / الأفلاج
عد المزون وعد ماينقطنه
يامرحبا بالصفحه المليانه
والنجر يافاروق ما احلى رطنه
رمز الكرم والجود هو عنوانه
عطا الله بن سليمان العطا الله / الزلفي
يا ناشد أهل العرف وأهل الفطنه
شكراً.. وحياك الولي سبحانه
الرجل أعرفه زين وأعرف رطنه
النجر قبل طلعة الطحانه
حاشم خلف الشمري/ الرياض
من قلبٍ أصفى من بياض القطنه
يامرحبا خذها بنطق لسانه
الرجل أعرفه وأعرف أهل الفطنه
النجر حله.. والكرم عنوانه
جهاد العقيلي / الرياض
لغز الجزيرة عارفينٍ لطنه
راعي الكرم والكيف هو فنانه
يازين صوته مع نزيل القطنه
لامن جذب بعد العشا ضيفانه
باني فايز السبيعي/ الاحساء
اللغز نفهم في نباه ورطنه
والفكر لو روّح نمس عنانه
والنجر والله لو تنوشه قطنه
يوحي صداه اللي يسوق اضعانه
فهد الجروان / الزلفي
هذاك نجر الماو ما أحلا رطنه
يا حلو صوت النجر عبر أزمانه
صوته يونّس من همومه شطنه
عندي ومن يزهى النجر ديوانه
جلعود بن لافي الشمري/ حائل
في طرسٍ ابيض من بياض القطنه
اكتب جواب ما اختلف ميزانه
ياهل الذهانة والدّها والفطنه
هذا «النجر» ما احدٍ جهل عنوانه
ناصر بن فهد الرضيان / الرياض
القاف رغم إنه وقف على أطنه
جينا نجدّف بالبحر من شانه
النجر ياهل العرف مابه رطنه
لو هو جديد بفكرته وأوزانه