ولا استغربت تتويج الرياض,, وذي عوايدها

الرياض ,, الحب,، العطاء,, الملاذ بعد الله لكل عربي ومسلم كل هذه وأكثر من الاسماء والصفات التي تعني الجود,, والمجد والمنعة كلها عاصمة مملكتنا الحبيبة التي احتضنت الثقافة والمعرفة,, واختيرت هذا العام لتكون عاصمة الثقافة العربية.
عن هذا الحدث,, وعن الوطن وأهله الاوفياء كتب الشاعر أيوب بن حجاب بن نحيت هذه القصيدة التي تفيض وفاء,, وشاعرية عذبة:
حلفت اني ما أطوف فرصةٍ تستاهل الابيات
وجاب الله لي الفرصة وأنا كم لي أراودها
هلا يا احلا الفرص أيو الله وجت بأسعد الاوقات
ولا استغربت تتويج الرياض وذي عوايدها
اهني شعبنا المخلص واخص التهنئة بالذات
لامير إرياضنا اللي كم تفنن من تسيدها
ألا ما احلى القصايد فيك ياسلمان لا من جات
تجيني تنسرد من حالها من غير ما اسردها
تجي مكتوبةٍ لي بأحرفٍ من نور منظومات
وانا انقلهامثل ماهي تماماً ما ازودها
وإسمح لي بمدحة فعلك اللي ما يريد اثبات
مديحٍ يسعد المنصف ويصفع خدجا جدها
أبرفع لك عن الشعب السعودي ابيض الرايات
وما خفي بصدور الشعب فاق اللي تشاهدها
فمن عرعر إلى جازان,, من جده إلى سيهات
نجيكم بالوفا صافين للبيعة نجددها
لنا وقفاتنا اللي لو شهدها جابر العثرات
تحاقر قصته في ماضي الوقت وتزاهدها
وهمة شعبنا اسلامية الاهداف والغايات
ولا يمكن تغير والله الحافظ امجودها
وحنا اهل الامانة ما نخون أبدا أبد هيهات
نبيع ارواحنا دون العهد للي نعاهدها
وكان إنه بدا بالجو من زوم العدا غارات
وقفنا للعدا وش عاد لو يكثر توعدها
لو إنا لو تراخمنا نخلد ما نصير أموات
دفنا روسنا بالقاع لو كلٍ تهبدها
ولكن النبي صلى عليه الله قبلي مات
ومن ذاق الشهادة لو حيا وده يعاودها
وحنا يا طويل العمر نعشق هادم اللذات
ما دام إن اشهدانا جنة الفردوس موعدها
يدّوي صوتنا بالحرب تسبيحٍ وتهليلات
وإلى منه نصرنا الله قلنا يا لعدو عدها
وحنا لا استجار إبنا الدخيل يكسر العبرات
تلقيناه بالاحضان وجروحه نضمدها
وقمنا القومه اللي تفتخر فيها هل الفزعات
وفزعات السعودي من سمع فيها يمجدها
تغنى غيرنا بحكومةٍ جابت لهم نكبات
تجرجرهم على الويلات يامكثر شواهدها
وآل سعود تصنع مجد شعب المملكة بسكات
ورانا ما انتغنى بك وباخوانك ونيدها
فهدنا اللي لو إنه كاشتٍ في روضة التنهات
تهابه روس الاعدا هيبة الغابة لسيدها
هذاك الحاكم إلي لا عون ذيابة الغابات
وتعاوى بعضهن للبعض بس الليل شاهدها
ضحك ضحك الاسد والعين حمرا تحكم النظرات
الين اشجعهم يقول اشهد إني رحت مع يدها
تعيش اعيونك الي يا فهد بتنا وهي ما تبات
مغير اتحسس هموم المسلمين وتفقدها
ويسلم سيفك اللي لا تكابر عجة القالات
نذر روحه ولا يرتاح لين إنه يهجدها
أبو متعب ليا صاب العرب من غيرهم هزات
تولى حلها بالحال هينها وكايدها
له اسلوبٍ تميز فيه دايم بأكثر الجلسات
تجيه الناس بعد الناس ينشدها ويسعدها
ووزير الجيش خلى الشعب كله رافع الهامات
عسى ربي يحفظ بلادنا لاهان قايدها