سيرة امجاد

شعر: د. صالح الشادي

فاخري يابلاد الشمس بين الشموس
وعاذك الله من القالات وطعونها
كل وجه يشيخ إلا غروسك غروس
كل يوم وغصونك تصدح لحونها
سيرة امجاد تملاالذاكرة والطروس
وهي عطور السنين و ملح ليمونها
طربة اللي يصيغون الحِكم و الدروس
وكل جيل وله صفحات تقرونها
ناظروها وشوفوا فتنة العيطموس
لا مثيل لها، لا لا ولا لونها
للسما والمعالي تصعد ولا نكوس
وقصة المجد صار الكل يحكونها
مدت القلب حب وطيب ماهو خنوس
وبآخر الدرب، شيمة، جادت مزونها
عبقرية غلاها داست الكره دوس
واستفاقت على ناس يحبونها
مملكة خير فيها كل شبر محروس
مكرم الله ثراها وحامي ركونها
ناسها من عروق الطيب/ تيجان روس
هم نخلها وأهلها ونبعة عيونها
ماتعرف الخصام، ولا تعرف العُبوس
لكن الله يعين اللي يعادونها
سلمها سلم وأما بالدعاوي ضروس
الأباليس ياما قصت قرونها
ولو تدور الليالي / لوتعود البسوس
ما تخلت عن المبدا وقانونها
مادرت بالغرير وجاهل مايسوس
ولا عليها من اللي يستفزونها
شامخة، في رحاب الله عز مْغروس
قبلة ارواح والعباد ينصونها
ساسها سنة الله، لا وثن لا مجوس
والشريعة أمانة رب ونصونها
يرحم اللي رعاها لين صارت تهوس
ويرحم اللي بناها ودشن حصونها
ويحفظ الله أبو متعب رفيع الجلوس
خادم المسجدين وقرة عيونها
الكريم الحميم اللي سكن بالنفوس-
ونايبه، والكرام، ومن ثنى دونها
من قديم الزمان ومملكتنا عروس
بنت عز لها عاشق ومجنونها