سبحانك الله من أحيا ومن أخرج..

يا منزل لكل داء دواه وعلاجه
آمنت باسماك اللهم والمعرج..
وآمنت بالبيت معتمره وحجاجه
يارب يارب وخيول الكبد تسرج..
وأنا ورى باب غيٍ صك مزلاجه
مانيب من دون رغبات الرجيم أعرج..
أركض ورى حاجةٍ ماليبها حاجه
يقوله المستغيث اللي لقال أحرج..
طلابت الجاه والشرهات والحاجه
حسير راسٍ كسيرٍ تايبٍ مُحرج..
مستسلمٍ تستبيح الذله إحجاجه
يالله تسخر لعبدك يالغني مخرج..
يوم إنه أمسى بغيٍ تصفق أمواجه
يالله بهمٍ يزول وضيقةٍ تفرج..
ويالله بقلبٍ إلا أذنب عود أدراجه
رحمتك رحمتك من حاجات ماتهرج..
رحمتك رحمتك يارحمن في حاجه
آمنت بك والنبي والبيت والمعرج..
ومالي بعد رحمتك يارب في حاجه
رحمتك والقلب في وحل اللمم مضرج..
عجزت أطوله.. وعيا يرجع أدراجه
يارب عبدك وابن عبدك الا حشرج..
رحمتك لآبيه وله وأبناه وأزواجه
مايندرى باسم ابن دواس هو يدرج..
في جنة الخلد؟! والا بنار وهاجه؟!
الشاعر/ عبدالله الدواس - رياض الخبراء