زبن بن عمير بن زبن بن عمير

يابو تركي عسى ربي يحفظك

هلا بقدوم زحزيح الرجالي
هلا في شيخنا اللي نحتفي به
هلا به عد ذرات الرمالي
هلا مليون.. واكثر.. صدق وأكثر
كثر ما هل همَّال الخيالي
وكثر ماقالت: الناس القصايد
سوا في عشق.. أو مدح.. وتعالي
وشعري لو سألته وش مجالك؟
مشاعر صادقه في شيخ غالي
يابو تركي عسى ربي.. يحفظك
وتعيش بعز في طول الليالي
عسى الرحمن يكثر لك ثوابك
ويلبسك السلامه بالمعالي
ويقبل منك حسناتك.. ويقبل
دعا.. والتصدق.. وابتهالي
وانا ماقلت متزلف ولكن
انا شاعر.. وهذا هو مجالي
ولا في قدرتي رد الجمايل
جمايلكم عليّ دايم توالي
هلا بك ياشبل صقر الجزيرة
عدد ماهب غربٍ او شمالي
وعدد ما هز عاشق قاف عاشق
وهيَّض به بعد ما كان سالي
وعدد ما طاف حجاجٍ ولبوا
يبون العفو من رب الجلالي
فرحنا فيك عيَّدنا سررنا
بقدومك سالمٍ في كل حالي
نعم نفرح.. نعم نفخر.. ونطرب
بعز الشهم شيَّال الثقالي
الى قامت ليال الوقت تقسى
نشوفك بالشدايد ماتبالي
يمينك للعدا سمٍ ذحاحي
وفيها للصديق الماء الزلالي
وانا ارجي سيدي تقبل قصيدي
(وانا عتيبي وقحطانٍ خوالي)
اعرف ان الشعر نبض المشاعر
ولكن ما وفى باللي ببالي
ولكني كتبته من خفوقي
وجودك ما يطولنّه حبالي
لعل الله بلطفه واقتداره
نهار يحط ميزان العدالي
يثقل وزنكم يابن الاماجد
ويظلك تحت عرشه بالظلالي
واعود لما.. كتبته بالبدايه
هلا بقدوم زحزيح الرجالي