عطا الله بن سليمان العطا الله

يوم الأمجاد

يوم البلاد اللي نعيش برغدها
يوم البلاد اللي لها الحب يزداد
نفخر بماضيها وحاضر عهدها
يا لله عسى أيامك مسرات وأعياد
يا دولة بالشرع تحكم وحدها
جزيرة كانت متاهات وأجراد
ومن عاش فيها ليلةٍ ما رقدها
جزيرةٍ كانت بها كل الأضداد
وفيها المصايب صارت أمر وادها
فوضى وظلم وجور وافساد وعناد
والناس كثر الخوف طول سهدها
والناس فيها ما لقت لقمة الزاد
ما بين هم وبين خوف ضهدها
وزود على ذا الحيف بربوعها ساد
وعمت بها أمراضٍ تناهش جسدها
ويوم ان رب الكون في دبرته راد
قيض لدولتنا العزيزة أسدها
قيض لها حر عزوم وهدَّاد
قيض لها ليثٍ بسيفه همدها
أقبل من المشرق معه سيف وجواد
وداس الخطر لعيون دارٍ قصدها
ولانت له بسيفٍ للارقاب نشاد
وارقاب عدوانه بسيفه حصدها
ما جت له الا عقب ما زال الانكاد
قوم يصبحها وقوم هجدها
معظم حياته راح بكفاح وجهاد
حتى حصلت له كل غاية نشدها
وفي واحد وخمسين للعز ميعاد
وحَّد جزيرتنا ورسَّى عمدها
لم الشتات وجمَّع قلوب الأنداد
وكل الفتن دمدم عليها لحدها
وفي كل شبرٍ من قممها والأوهاد
طبق شريعة ربنا واعتمدها
نرفع له البيضاء على روس الأشهاد
يا بعد هقواته ويا طول أمدها
عساه بالجنات للحوض وراد
ومن يفعل الحسنات قدمه وجدها
وعقبه حكمها اللي على المملكة جاد
سعود بالشدات داره سندها
ثم استلمها اللي به الفكر وقَّاد
وعنها العدا من كل صوب طردها
فيصل سياسي له الطيب شهاد
في همته صعب المراقي صعدها
وجا عقبه اللي للمهمات سداد
خالد مواريد الشهامة وردها
ثم استلمها اللي له الشعر ينقاد
عشرين عام زمامها مع فهدها
صار الفهد للمملكة درع وعماد
أعلى مكانتها ووفى عهدها
مواقفه واجد ولو كانت قصاد
مواقفه بالطيب ما احصي عددها
على السياسة حط له عرش وشداد
وكلمته مثل السيف لامن نقدها
والقدس تشهد له بوقفات وامداد
يوم انتفاضتها بماله رفدها
وتشهد له البيتين واللي بها أشاد
والتوسعة كل بعهده حمدها
عزام جزام وحلال عقاد
يفتل وينقض لو تشابك عقدها
وللمملكة يهدي مشاريع جداد
عز الله أنه هو ذراها وسعدها
وصارت لنا الكلمة بمصدر وميراد
وديارنا بالأمن كل حسدها
وولي عهده للمهمات نشاد
خلى العدا ترضخ ويركد زبدها
للخير مداد وللشر رداد
واليا هرج عدوانه تعض يدها
على العدا سم به تذوب الأكباد
وعلى المواطن مثل حالي شهدها
والنايب الثاني على الخير معتاد
مكارمه والله ما أحد جحدها
لمواطنين المملكة خير واسعاد
وعلى العدا سقم العيون ورمدها
واخوانهم وعيالهم نعم الأولاد
أسرة شجاعة دوم توفي وعدها
نعم الرجال ونعم والله الأجواد
نعم الرجال اللي تطور بلدها
يارب تعمي عنهم عيون الأحقاد
وعدوانهم يارب زد في نكدها
نحب دولتنا جماعات وأفراد
ونقول لك يا فهد للمجد قدها
وختامها واعداد ما حن رعاد
صلوا على اللي سنته نعتقدها