حلول اللغز

نشرنا في عدد الأسبوع الماضي لغزاً كتبه الشاعر راجي نواد الشمري من منطقة حايل كان نصه:
أنا ابا أنشدك عن عذرا تسلّي
قليل العرف يلقى به مراده
عشيقه لايصوم ولايصلي
والى شافه هنا عينه رقاده
وقد وصلتنا عشرات الحلول الصحيحة واخترنا منها ما اكتملت فيه شروط النشر فكانت كما يلي:
أنا أدري عن نوايا صاحباً لي
وإبن نواد له بالدفن عاده
بنا بيت على الجاهل يدلي
وعلى لهاية الجاهل وكاده
فهد سعود العتيبي
المجمعة
***
علينا يا سحابة بالله هلي
وانثري معناك في لطف وركاده
وش نقول بهالبنيّه وش نخلي
دامها لهاية الورع بمهاده
فهد الجروان
الزلفي
***
هلا بك من هواجيس المهلي
عساه يدوم لك وقت السعاده
وغيدك يوم باله مسفهلي
ترى لهايته تحت الوساده
مبارك العتيبي
حائل
***
ألا يامرحبا باللغز واللي
كتب لغز الجزيرة في ركاده
قريت اللغز أنا وأرسلت حلي
وهو رضّاعة الطفل ابمهاده
وليد صالح الشقيق
الأسياح
***
وش اباخذ من الخافي واخلي
مادام النوم للموذي عباده
يجيني نصف الاحلام ابمحلي
مثل لهاية الطفل ابمهاده
محمد عبدالكريم الغزي
الزلفي
***
الا يالله لك اسجد واصلي
تعين العبد في غاية مراده
عرفت اللغز ساعة ماوصلي
لهاية طفل ملفوف بمهاده
فهد علي الحربي
ضرية
***
هلا بصفحة تراث اللي تطلي
وهي صارت محل للرياده
رمعت الحل وأدنيت السجلي
وترى اللهاية بجنب الوساده
محمد بن حمد البدر
الزلفي
***
ياراجي لغزك اللي يوم طلي
قريناه بعناية وبركاده
وعرفنا الحل والحاسد يولي
وهو لهايةٍ للطفل عاده
عبدالله حمد البدر
الزلفي
***
قريت اللغز يوم اللغز طلي
كما الزملوق في قلب العراده
صحيح الطفل يلعب مايصلي
وله لعبوبة مثل الجراده
نافع الحربي
الرياض
***
صغيراً منه نومي ماحصل لي
به الازعاج طول الوقت عاده
أبهدي له لعب يمكن يحلي
ومع الاهداء لهاية زياده
نايف محمد الأسيد
القريات
***
هلا بالشمري واعطيك حلي
خذه من دون نقص ولازياده
قليل العرف دايم مايملي
من اللهايه وعندي شهاده
عطا الله بن سليمان العطا الله
الزلفي
***
بغيت ارقد ولكن ماحصل لي
سبب لغز به اتقان واجاده
ولقيت البنت مصاصه تسلي
مع الاطفال دايم في مهاده
فيصل بن فهد الراضي
قضيباء
***
ترى مافيه لغز مايحلي
وانا شاركت واعطيت الافادة
والا ياللي كتبت اللغز قلي
عسى طفل العرب يبلغ مراده
ليا جابو له اللعبه يهلي
وليابلغ رشده مطالب بالعباده
سعيد مسعد السليمي
بلدة ذوقان
***
عبر صفحة تراث ماتملي
بها الغاز واشطار وافاده
قريت اللغز وابشر جاك حلي
مصاصة يلقى به طفلي مراده
راضي فهد الراضي
قضيباء
***
هلا يامرحبا بالشاعر اللي
على لغزه نقدم له شهاده
عسى المولود يرضع مايملي
ويبقى من مواليد السعاده
صويلح عبيسان الشيباني
الرياض
***
مافيه لغز الا يجي له حلي
وانا لقيت الحل في ميراده
المرضعة تنقذ حسين الدلي
عشيقها الطفل وصارت عاده
مسفر فهد السبيعي