حلول اللغز

نشرنا في عدد الجمعة الماضي لغز كتبه صالح بن عبدالله الزرير التميمي من محافظة الرس وقد حالت صياغته الشعرية او بالأصح البحر الذي اختاره دون نشر عدد من الحلول الصحيحة لأن أصحابها لم يلتزموا بالبحر أو الطرق بدقة وكان نصه:
أبا أنشد من عطاه الله ذكا ومحب للالغاز
عن اللي تولد من أبوه وتبعد ما تجي يمه
ما دامه حي أبوها تفيد الناس ما يعتاز
والى منه فنى تفنى يا عارف لغزنا سمه
وقد جاءت الحلول الصحيحة التي اكتملت فيها شروط النشر كما يلي:
أقول ان التميمي صاغ لغز يا عرب ممتاز
وأنا حظي بري ما ذم لغز الرجل ما أذمه
على المال وزكاته ركب المعنى ولا يعتاز
ولا يا حبني للي يزكي المال لا لمه
ناصر عبدالله المسيميري
الرس
***
أنا باقول يا صالح على وضح النقا ممتاز
ترا الأعمال بالنيات والزكاه بالذمة
زكاة المال ندفعها على الضعيف والمعتاز
شرعها المصطفى المختار نبي الدين والأمة
محمد علي السالمي
رفحاء
***
لكم مجهود وافي يحرج الهماز واللماز
وصلتوا يا النشاما واستقريتوا على القمه
مع التنويع والتطوير والابداع والانجاز
وفيتوا بالامانه كامله وابريتوا الذمه
زكاه الجاه مثل المال ياهل المعرفه بايجاز
تسب الناس من يبخل عليها الجاه وتذمه
محمد عبدالكريم الغزي
الزلفي
***
سلامي يا الحميدي والتميمي والنفوس اعزاز
وأهل صفحة تراث الشعر والألغاز والهمة
قريت اللغز براق المعاني منوة المعتاز
زكاة المال قررها الاسلام لبائس الأمة
خليف الحربي
الرياض
***
يصير اخفاق للي دايم تقديرهم ممتاز
حسب طرح السؤال اللي يجي بالفتح والضمه
زكاة المال واجب دفعها للمسلم المعتاز
تحددها الشريعه من دفعها يبري الذمه
موسم بن سفر القثامي
الطائف
***
ابا جاوبك يا ولد الزرير محكم الالغاز
اجابه ما للغزك يا التميمي غيرها يمه
تراها ثالث اركان العقيده كان حلي جاز
قراها كل مسلم في رساله سيد الامه
حمود بن جعيثن العطاوي
عفيف
***
هلا بك يا التميمي عد ما شعر المواهب فاز
مع اللي شاب من فتل المعاني وانحمس دمه
ترا لغز الجزيرة يوم قزه مجهر القزاز
زكاة المال حق للفقير اللي شكا همه
نافع الحربي
الرياض
***
ألا يا اهل الجزيرة صالح بن زرير لغزه فاز
أخذ به مركز يا أهل الجزيرة باول القمه
عرفنا الحل يا صالح وحله نكتبه بايجاز
زكاة المال فرض وما جحدها راعي الذمه
عطا الله بن سليمان العطا الله
الزلفي
***
هلا حي الله اللي يكتبون الهادفه بايجاز
يجيبون الثمين ويفهمون الدرب واليمه
عسى يفداكم اللي بالحداثه همه استفزاز
على موج الخيال يضيع التفكير ويخمه
طموحه صورته وقت الشباب بداخل البرواز
وأنا عارف زكاه المال بالتنوين والضمه
الأيمن - الزلفي
***
على دار الرجال اللي علينا يا النشاما اعزاز
تباشير الغلا ساقت ضعنها تنطح اليمة
من الزلفي سرت غير التميمي ما لها معناز
ولها طاب الحديث بحضرته والناس ملتمة
زكاة المال يا صالح عليها كل شي جاز
بدالي ذكرها قدام بيت اللغز لا اتمه
فهد الجروان