تستاهل التقدير

للأمير خالد بن سلطان بن عبدالعزيز تقدير كبير في نفوس الجميع.
والشاعر عبدالرحمن الجبرين يجسد بعض المشاعر تجاه سموه بعد ان هنأه بالمنصب الجديد الذي اسعد خبره كل محبي سموه اذ يقول:
من شاعر لامايتاجر بالاشعار
ولايفتل من ابياته الا جزالها
مهو بزهد في بنيّات الافكار
حتى نوردها على غير اهلها
مير ان خالد من صواريم الاحرار
نسل الرجال اللي ينومس فعلها
مني لابو فيصل عدد رش الامطار
اصدق تراحيب مصفى عسلها
تستاهل التقدير,, يسلم من اختار
مثلك جدير بالثقة يمتثلها
خبرة قيادي ملم بالاسرار
مناصب عليا بجهده وصلها
حنا نسجل شكرنا صغار وكبار
للي جهوده من اجلنا بذلها
اجزل معاني الشعر من دونك قصار
مهما حبكنا في مديحك فتلها
شرواك بتار ومن غمد بتار
ابوك سلطان المكارم فحلها
خذت من ابوك الوافي اوصاف كثار
مكارم الاخلاق يا امير كلّها
والحر ماينجب سوى احرار الاوكار
وازكى مجاني العود تنبت مثلها
جدك معزي ممن الدار والجار
جعله بدار الخلد باعلى نزلها
احيا الشريعة والعدل عم الاقطار
وكل الجرايم في مهدها قتلها
وكل الملوك اللي لهم بالعلا كار
عمانك اهل الطيب ياطيب اصلها
هذه شجرة الخير تهديك الاثمار
والشعب كله يستظل بعدلها
تتغير الايام والوقت دوار
والطيب ثابت في اصلها وفصلها
ماهو غريب ان كان قمتوا بها الأدوار
شبه الجزيرة تعتبركم املها
يوم اشرق الحكم السعودي بالانوار
عقب الجزيرة عمّ فيها جهلها
تقطعت فيها السبل والامن غار
والناس باتت غارقة في وحلها
آويتوا الدعوة وقمتوا لها انصار
يوم إن كل صد عنها,, وخذلها
ياسيدي تعجز عن الوصف الاشعار
مير ان صدق العاطفة تشتملها
وختامها صلوا على سيد الابرار
على محمد ماتساقط وبلها