الشعر

يلوح برق القصيد ويبتسم له غمام
وتعشوشب اوراق شعري من مصافح قلم
مشاعرٍ صادقه ما هي مجرد كلام
تبطي وتبقى بيمنى الوقت مثل الوشم
نوادرٍ فارقات ومن شموخ وتمام
خاتم عليهن بنقوة در فكري ختم
ما كل شعرٍ بعين العقل قد المقام
كم حرف شاعر فتح بالنفس جرح وألم
اليا كتب عادت ورود القوافي حيام
ما أروى غرور المعاني لو خزمها خزم
اما تجي فكرته تلبس ثياب الملام
والا خذا فكرةٍ قبله عليها وسم
كم مبدعٍ لا سمعته قلت له يا سلام
تعيش من جود سبكه في خيال ونغم
ترقى وترقى وترقى لين حد الغمام
من نشوتك كن صدرك ما سكن به نسم
تحسها سلطنه - نشوه - وسطوة غرام
لو ان ما هي حقيقه قلت عنها وهم
الشعر فكره وصوره بين صحو وكتام
وانك ان ما هو مثل ما اقول يبقى نظم
صحيح ما فوق هذا الكون يرجع حطام
أدري واعرف الاوادم بين عين وخشم
لكني ازعل من الزله وأعض البهام
لا جاتني من عريب وراس ناس وعلم
اقولها حق ما هو ظن والا اتهام
لاني اعرف ان بعض الظن طبعاً أثم
يا ما من الناس يدهشك بلذيذ الكلام
ولا حان وقت الفعول يصير هش وقزم
اما تجي كلمة الرجال ضربة حسام
والا ترى الصمت له مكسب ونعم القسم
من لا يسرك اليا احتجته بيوم العسام
خله وتلقى بداله من رجال القيم
نفع القمر ما يبين الا بعز الظلام
ولا جاه نور النهار يروح نفعه عدم
الوافيه من نصيب مطوعين الجسام
نطاحة الكايده عشاق روس القمم
بعض المخاليق يكسب نعم عند الآنام
وبعض المخاليق يفنى ما كسب له نعم
لو عقلي أقصى طموحه بالعتب والخصام
وبيان خافي خصيمي كان يبطي عظم
شفني اصافحك ما هو من قدر واحترام
لكن ابذل يمناك بيمين الشحم
انا تساميت والمطمع برأس السنام
واشوم للطيب لو يشمل بعيد وخصم
حلمي وشفي ورغباتي بمسك الختام
وانا أعرف انه صعيب وفوق قمة هرم