مركب الروح

ياللي تأمل مركب الفكر والروح
دام الهوى بكفك أبفرد شراعي
أبيك تبحر في طباعي على ضوح
وابيك تغفى في دجا اقصاي واعي
وابيك تلقى مسلكي برقه يلوح
إذا دعاك من المتاهات داعي
ياصاح دامك جيتني كلك طموح
في رفقتي.. مال أبيض الكذب داعي
أنا ترى هذا أنا.. وين ما أروح
وفاي: قنديلي.. وصدقي شعاعي
أكذب عليك إن قلت أنا كتاب مفتوح
وأكذب عليك إن قلت: صعبه طباعي
مرات أكون أعنف من إنسان مجروح
ومرات أكون أبسط من أحلام ساعي
في داخلي صمت المحبين والبوح
وفي رحلتي وصوت الدليل وضياعي
تشوفني غامض وأنا كلي وضوح
وتظنني واضح وهذا قناعي
هنا أجي ذنب ونهايات وجروح
وهناك مثل الناي بكفوف راعي
بوحي: صدى صمت.. وسكوتي: صدى جموح
لكلمة سماي اللي بكت صمت قاعي
لو بحت ما قلت الحزن وقت ويروح
لو شلت خفت الحزن يلويي ذراعي
ياصاح.. وإن شفت أكثر الصمت مبحوح
اسمع نداي إن كنت غاوي سماعي
أنا مثل ما قلت.. والحرف مطروح
شفني.. ترى مليت أحسب وأراعي
إن جيتني خل أكبر الذنب مدموح
وأنا ابفرد للموده شراعي
وإن رحت عني قلت: مسموح مسموح
اسهل وداعات الأحبة وداعي
بس لا تعلقني على مركب الروح
أما انسني ولا تحمل طباعي!!