خارج الإطار

لاتحفشي ماهو بماء صرحٍ ممرد من زجاج
أنا المعرض للغرق مدري على وين اتجه
وانتي على مهلك وخطواتك تنظم إحتجاج
شوفيني اتصبب عرق حاله وربي محرجه
أرخي بسرعه حل بي زلزال واشعر بارتجاج
فكك ضلوعي رجف خفاقي يدور مخرجه
وبدون ماتتكلم اهدتني ابتسامتها علاج
حسيت لحظتها بشيٍ ماقدرت استنتجه
قلت اعذري لي ربكة اسلوبي إذا منه انزعاج
وتصوري وش صار لي واستنتجي ما توجه
حران بردان اجتمع صيف وشتا في امتزاج
مدري توافق في الخصايص أو تناقض أمزجه
واصبح خريفي من ربيعك مرتدي ثوب ابتهاج
شميت عطرك فيه قبل ازكى زهورك تنسجه
منك انتشيت ونشوتي منها انتشت كل الفجاج
خلاصة اجمل شي في الدنيا عرفت استخرجه
نكهة رحيق الفجر من ثغرك تسابيح انبلاج
مشروبي الفاخر وغيري ماعلم عن منتجه
وجدتك القاروره اللي يتقد فيها سراج
وهّاج لكنه دفا قلبي وله ياما احوجه
ايه انبهرت اول ولا زالت انبهر من حين ماج
في بحر عينك طرفي المفتون واربك منهجه
هذا أنا مايحجز ابحاري وتحليقي سياج
أعبر إلى الآفاق ما اغراني الهبوط ومدرجه
سر العيون السود سحري واللمى خمر المزاج
يالايمي وفر دروسك ما أحب الأدلجه