دافع البلا

يارب سترك من اللي قاعد يصير بالدنيا، تحس انك صدق في اخر الزمان اللي يقولون عنه، قبل شوي اطالع بالأخبار، مدري اسمع مذيع الاخبار وش يقول، مدري اقرأ شريط الاخبار اللي يمشي تحت صورته، واكثر المصايب بالشرق الاوسط، واكثر مصايب الشرق الاوسط الاخبار اللي تخص العرب، تحس ان مافيه احد بالكرة الارضية غير الدول العربية حسبي الله على امريكا (ماعرف بالسياسة بس كل عربي قلبه ينغزه من امريكا لو طاح ولده من درج بيتهم)، لي كم يوم وانا ماطالع اخبار ابد وحسيت ان لون خدودي رجع وان تجاعيد جبهتي راح نصها، كل الاخبار او يمكن اكثرها مصدره العرب، حماس وفتح متقاضبين الحلوق، والعراق صار صوت الانفجار بالشوارع شي عادي كنك تشوف طراطيع مو قنابل، موت وصلخ وذبح، الناس تتطور وتنتج والعرب زباين لتجار السلاح والقنابل، الحين الاخ لو تزاعل مع اخوه مايقوله غير أهجد لاتقبس الحرب بيني وبينك، المخ العربي تحس انه يتعلم كلمة حرب قبل لايتعلم ينطق كلمة بابا (ماعليش لازم أبالغ عشان تتحمسون مع موضوعي)، احس ان حتى حالات الطلاق المرتفعة عند العرب اكثر من اي بلد ثاني سببها ان الزوج يحس انه بحالة حرب ولازم يقتل حرمته برصاصة الطلاق، مشجعين الاندية اللي يشلخون في بعض في المنتديات يحسون انهم بحالة حرب ولاراح يرتاحون لين يموتون كل مشجعين النادي الثاني، صدق مدري العرب وش يحسون به؟ لو تفتح مخهم ماتلقى غير كلمة حرب بمعاني كتير، ياحبني لي وانا اتفلسف وانا مادري وش السالفة!