يابرودك

وجه شاحب دمعتين وجرح غاير
صوت أغاني شمعتين وياسمينه
هذا جوّي أحترِق حرقة سجاير
لين جاني صوتك الله لايهينه
الغياب اللي سرَق لون الستاير
ماتَرَك في غرفتي أمن وسكينة
والوله متخبيٍ بين الظفاير
في خصل شعري ومابيني وبينه
ثار حزني والتهب جِلد الضماير
وأنتَ قلبك مادرى عن ساكنينه
قلت: ألو ، يابنت ليه الصوت حاير؟
قلت أنا: اسأل جروحك والغبينه
يابرودك جيتني والدم فاير
لا وتهمس وش بلى روحك حزينه
جيت تسأل: في غيابي ويش صاير
وش تغيّر في شوارع هالمدينه
كيف أجاوب والجِفِن فجّ العباير
والحكي: مولود فاقد والدينه
كم تمنّيتك تجي والوقت جاير
بس تأخّر موعِدك للحين.. وينه
رحت عنّي وانتفض صوت البشاير
وانكسر ضلع الفرَح والحال شينه
التعب: صندوق فيه أشباه طاير
والصبِر: مفتاح مشلولة يدينه
كلمة وحدة والله أعلم بالسراير
مانسيتك والخفوق الله يعينه
بدور البدر - شاعرة سعودية