الحلا

يا حلا فيك الحلا زايد حلاه
كل يوم تظهر بشي جديد
يا جميل الوجه والقامة معاه
شفتك وقلبي عقب شوفك يقيد
لك جبين شع بالعالم سناه
ضاوي نوره بالكون ويزيد
يجهر عيون الملا شدة ضياه
ياصله هاك الضيا لوح بعيد
كل زين الكون بعيونك بهاه
وفي بقاياك الحلا فوق الرصيد
بسمتك تشرح فؤادي يا عناه
كل معنى من ورا البسمة شديد
في شفاتك موت وبريقك نجاه
مخرج الكلمات من فمك اتغريد
حبك بجوفي تعدا منتهاه
وان صبرت الصبر مفعوله زهيد
كل نبلٍ صادقٍ منك جاه
من عيونٍ سهمها غصبٍ يصيد
كل لبسٍ تلبسه زينك عطاه
رونق وذوق وفخامة يافريد
لا مشيت الكل يعطيك إنتباه
أصبحت مشيتك موضة للعديد
فيك منه .. ومنك فيه أحلى صفاه
جعل عزك دايم وقلبك سعيد
عاش من سماك باسمك واجتباه
اشهد إنه سيد من نجل سيد
كل شي فيك يعجزني ثناه
يا وحيد الحسن والوالد وحيد