خلوها

بين الشاعر الكبير رشيد الزلامي والشاعر تركي الميزاني ، جرى ذات مساء هذه المحاورة والتي كانت على النحو التالي:
رشيد:
إسمحوا لي على تركي خليفة مطير
ودّي أمزح عليه بكل حشمة وأدب
تركي الفين تالي الوقت وضعه خطير
يالله إنك تفكّه من عيون العرب
تركي:
أنت مزحك مع الشعار مزح ٍ كثير
مير صاحبك ماهمّه ولا أطلق شنب
فيه للشر شر وفيه للخير خير
إنتبه ياوسيع المعرفه واحتسب
رشيد:
عدّل العوجه اللي في رقبة البعير
ثمّ تعطى قلادة كلها من ذهب
بالزمان القديم وبالزمان الأخير
قيل من قارب الجربا يجيه الجرب
تركي:
أنت رجل ٍ ذهين وبالسوالف خبير
مير في تالي أيامك عليك العتب
إقضب إقضب حدودك لاتجي لي مغير
قدمك النار وأنته من حساب الحطب
رشيد:
تسبح الباخرة فالبحر لو هو غزير
والتّروكي ليا جرَّوا عليه انقلب
لك مع العسر يسر وكل شي يصير
ما أحسد اللحية اللي تستحق الشبب
تركي:
أبشر إني على هوني وسيفي شطير
وأذبح العقرب اللي سمّها فالذنب
مير قدّم حبوبك والرحا يستدير
مايفوت بجماد تحصله في رجب
رشيد:
لو نصدقك مالك فالمراجل خشير
مير بالعكس تبت يدك يابو لهب
صاحبك رجل شايب وانت توّك صغير
خلها ترتفع جوختك فوق الركب
تركي:
كل طيرٍ ليا رفرف جناحه يطير
غير ذيك الطيور اللي تجي بالخشب
إقصر السالفة قدام علم ٍ يصير
لاتعرّض عيونك للشقا والتعب
رشيد:
ما أقدر أكسر جناحك عند وجه الأمير
طير ياطير وآخر مرحلة تنّكب
روح ياتركي اسحب فوق دربك حظير
مير لاتنتهي رحلتك وأنت السبب
تركي:
أنت ودك بكسره مير كفك قصير
لاتعرّض طريق مطوّعين الصّعب