سفر الجفا

شعر- صالح الصخري
وهلّ الصبح بعيون المرايا طاغيٍ مختال
فهق كف الظلام اللي نحتني عن بساتيني
سكب في جرهد عيوني من اسراب الفرح شلّال
وانا الظامي على قطرة غلا والبعد مغديني
هلا بالتوت بالسكّر هلا بالساكن الرحّال
هلا باللي يراودني عن سكاتي ويغويني
حبيبي لو تدلى بك من قطوف العتب سلسال
قطفت العذر من عذق الغياب وجيت من حيني
انا العاشق على حد الحنين آدندن الموّال
تدرهم بي ذلول الشوق لا ضاعت عناويني
كتبت وغابت نجوم البلاغه والهوى لا زال
يمرجحني على صدر الحروف ويثمل سنيني
أحبك شمس ما يطغى على صفحاتها غربال
واحبك أرض ما تشبه سوى جنة غلا فيني
وانا آسف على كثر الرحيل اللي خذاني ظلال
وانا آسف على كثر الظروف اللي تسليني
لك الله يا العيون اللي غديتي للتعب مدهال
امانه كيف ما يطري على بالك تهليني!
وانا اللي كل ما مرّت عطورك في كفوف الشال
لقيت الشوق ياخذني على دربك يوديني
عبرت وكانت الرحله ألم واوجاعي المرسال
وجيتك جرح من سفر الجفا ودي تداويني
دخيلك هلّ بعيون المرايا طاغيٍ مختال
انا ظامي على قطرة غلا والبعد مغديني