(وليف الروح)

قال الفراق وقلت لاشك مزاح
لين المفارق سار والدرب دله
الله يعين اللي طعن قلبه جراح
والله يعين اللي به الفين عله
عز الله ان الحظ من وقفته طاح
من بعد ما عز الهوى بان ذله
ياليت طيفه ما طلع لي ولا لاح
ولاشد له قلبي ولاهو رحل له
مشتاق له والشوق بالحيل ذباح
اشرب مرار الشوق واذوق غله
طعنات صده كنها سيوف ورماح
تطعن بوسط القلب من دون زله
يا ناس طبعه يلزمه شرح وايضاح
لنه من اللي لا التقاء الخل مله
انا ببحر الحب والوصل سباح
وعرش الوفاء متوسد تحت ظله
الود في قلبي ومنه الغلا فاح
وقت المفارق لو يجينا نفله
روّح وليف الروح ياليت ما راح
وشلون ابلقى من يحل بمحله
في ليلتي برقب تباشير الاصباح
يمكن تتل القلب للسعد تله