باراك أوباما

الاهداء الى صديقي السوداني عبدالحكيم بمناسبة فوز باراك اوباما برئاسة امريكا ،وتصريح بعض المصادر بأن اصوله تعود الى جنوب السودان .
سافر لواشنطن وعمّر بيت يا عبدالحكيم=وسلّم على (باراك اوباما) وبارك له شمام
ما دام جدانه من السودان وانت افهم فهيم=طش العمامة والبس البدلة وشيّكها تمام
خل البنات الشقر تفتن فيك ياسمر ياوسيم=وغيّر ملامحك القديمة واكتب اسمك (فان دام)
ولو خذت جنسيّة وجاك الدور واصبحت الزعيم=خذني على يمناك ما تندم وانا من صلب يام
ودي تمشّي الدولة العظمى على النهج السليم=يا صامل الوقفات عدّل كل فقرة في النظام
واليا دخلت البيت الابيض غيّر السور القديم=وارسم على جداره غصن زيتون وانهار وحمام
وسولف لباحاته عن الضيقات في صدر الحليم=وقصة عجوز القاع والشيب الرمادي واللثام
يازول .. عفوا يافخامة ريس امريكا العظيم=ملح السواحل حاصر أوراق الشجر ستين عام
خلاص ملينا حكاوي الشمس ياليل العتيم=والطرقي الجايع حشا مايشبعه حلو الكلام
مايشفي جروحه نغم كاظم ولا عبدالحليم=وما يفرج همومه زمان الضحك مع عادل امام
ياطول قامات العرب واصواتهم وقت النعيم=ويا قصرهم لاولّع البارود بأطراف الخيام
اخطر قذيفة نرمي الشبشب ولا تدمي الصميم=معقول مانقدر وشبشبنا قدر يكسب وسام ؟!
ليه المذلة وين راح المجد والصيت الحشيم=دام الحجر بالعزم والنخوة هزم صاروخ سام
اليوم يابن النيل اشوف الجرح في الخافق اليم=مابين تشبيك الصقور وبين فزعات النعام
واصل طريقك لاعدمتك واحذر ابليس الرجيم=لا شفت ابو وجهين من حولك يردد ياسلام
ارسم مسارك بالعدل لاترتكب غلطة غشيم=هذا كلام اللي خويه في المواقف مايضام
لو ضايقوك ووجهوك تحوّل العالم جحيم=البس عمامتك القديمة ترفعك فوق الغمام
واترك بريق العرش وارجع زول ياعبدالحكيم=سمارك اطهر من بياض اللي كذب باسم السلام