ويسكي وجواري وغرزة حشيش .. وبالحلال بعد؟

الآن بمقدورك أخي القارئ التحشيش ، وابن أمه يقلك يا محشش ، وبمقدورك التدخين وخل واحد يقلك يا متتن ، اتصل على أقرب شرطة وقلهم هذا يقول لي يا متتن .. شوف ويش يسوون فيه، يجرونه من تلابيبه وعلى أقرب مستشفى للأمراض العقلية ، أحد بالله في الزمن هذا يقول للثاني يا متتن . لا وازيدك من الشعر غرفتين وصالة ؛ تقدر بعد تسطل .. أي والله .. تقدر تفلها بقارورتين كل يوم ، حبه في الصبح وحبة في المسا ، وحبذا لو طرقت بكاس قبل النوم .. عشان برضو تشوف أحلامك وانت معبي الطاسه.
أنت مستغرب صح .. أيه أدري .. بتقولي حرام ومدري وشهو .. خلاص ما عاد فيه حرام .. الحرام كان زمان أول .. الحين فلها ولا تلتفت لأحد .. الله يخلي لنا ( سلوى المطيري ).. الله يسعدها .. تروها ناشطة غير شكل .. يا هذا النشاط ولا فلا .. دايم تدور لنا حلول .. ما ترتاح ولا يهدأ لها بال لين تحصل حل .. كل حرام عند سلوى الطيري وله حل .. يعني مثلاً .. استشعرت الهانم أن الزنا وبلاويه طمت فقامت ( أم التدابير ) وصاحت على طريقة الفلاسفة ( وجدتها ) ثم صرحت بتصريح مدوي : المفروض على الرجال والنساء أن يشتروا جواري وعبيد ، .. طبعاً مو عشان يساعدونهم ولا يخدمونهم .. لا عشان لا يطيحون في الحرام .. الزنا و العياذ بالله .. لله درها من فكرة .. خلونا من ذي .. وتعالوا لوحدة ثانية أطم ..ناشطتنا ( سلوى ) حز في نفسها أن ترى المسلمين يتألمون ويتحسرون على ما فاتهم من لذة الخمر في الدنيا لما يرتجونه عند الله في الآخرة ، فقالت ليش الآخرة .. لازم تشرب الخمر في الدنيا وفي نفس الوقت ما تنحرم الأجر .. كيف ؟ قلتوا لي كيف ؟ الهانم اخترعت اختراع عظيم .. يخلص الناس من وطأة هذا حلال وهذا حرام .. لقد اخترعت ( ويسكي ) .. نعم ويسكي .. لا ..و سمّته ( ويسكي إسلامي ) .طبعاً الكلام هذا ما جبته من عندي .. الكل قرأه في صحيفة السياسة الكويتية .. وهي الصحيفة اللي بشرتنا بالخبر العظيم والحدث الجلل ، حيث أجرت معها حوار قالت فيه \" إنها ابتكرت ما أسمته خلطة ل\"ويسكي إسلامي\"، وقالت : \" إن الويسكي الإسلامي عبارة عن خلطة سحرية من الأعشاب تجلب البهجة والمتعة والسعادة لمن يحتسيها، مشيرة إلى أن الخلطة في مختبر وزارة البلدية، وتنتظر النتيجة، والموافقة لتبدأ العمل وطرحه بالأسواق \" .. يعني تقدر تشتري كرتون ويسكي وانت راجع من الدوام .. وتقدر تسوي لك بار في البيت ، لا وكلما جاك ضيف تصب له في ربع الكاسه ويسكي وتحط فيه مكعبات ثلج على طريقة الأفلام .. خل شركات الدعاية .. راح تتفنن في الدعايات ، هي أصلاً أبلشتنا بدعايات البيبسي فما بالك بدعايات الويسكي . خلوني أكمل لكم تصريحات مخترعة الويسكي في صحيفة السياسة ؛ تقول : \" أن الويسكي الإسلامي الذي أسمته أيضا \"خمر الوناسة\" يتكون من أعشاب طبيعية (نعناع ودارسين ومرمية ويانسون) وأعشاب أخرى مهدئة للأعصاب، وشرب كأس واحدة منه يجعل الإنسان سعيدا \" تخيل .. كلما حصل سوء فهم بينك وبين زوجتك وتكدرت أنت وياها .. تبادلا كأسين من خمر أختنا سلوى .. تنقلب الأمور 180 درجة ، وكلما فشلت في مشروع ؛ اطرق لك بكاس ، وكلما انهزم منتخب بلادك وفشّلك قدام العالم برّدها بكاس . ولا تنس تسوي لك غرزة حشيش .. مو زي الأفلام المصرية في حارة شعبية قذرة .. لا سوها وسط البيت وفي مجلس الرجال بعد .. أنت معك حشيش إسلامي مو حيا الله حشيش .. إذ يبدو أن السيدة الناشطة شعرت أن الخمر لا يلذ بلا سيجاره .. فقد صرحت في نفس الصحيفة : \" إنها تعد سيجارة مختلفة، وصفتها بسيجارة السعادة، وهي تتألف من خلطة أعشاب طبيعية، ولها رائحة عطرة كالبخور، تدخن سيجارة فتشعر بالمرح والتفاؤل، وتتعطر رائحة فمك، على عكس ما تفعله السيجارة العادية \" ، والله ما قصرت .. حتى توفر عليك ثمن العودة . أقول .. يا مثبت العقل والدين بس .
عبدالرحمن ظافر الشهري
Battar.bat@gmail.com