قصيدة للشاعر مشبب البشري

من لا وقف بي فالشدايد على خير
مالي بقربه ويش ابي في قباله
****
حتيش لو كانوا جموع وطوابير
مالي بمن همه لنفسه لحاله .
****
ينبيك لطيب عجوف المعاسير
ويكفيك م الطيب طوارف رساله
****
نصبر على جور الدهر والمقادير
وماقدمت يمنى الفتى في قباله
****
من لا يعدك راس مال ومذاخير
اشرب على فرقاه كيف البياله
****
مادامت النيه على الخير بالسير
فلا يهمك حاملين النقاله.
****
ماعقب هالمده طلايع تباشير
حتى لوانها جات ماهي تكاله
****
عندي قناعه لو نسوي تياسير
التاليه مع لوله في عجاله.
****
من قدم الشرهه فلاله معاذير
وكل مهبول نلجمه في هباله .
****
ياما على البيدا قطعنا مشاوير
نبغى رضى الله والطمع في الجزاله
****
ولا لقينا غير عش الدبابير
مابين قال افلان وفلان قاله .
****
من لا يخاف الله بيقول ويجير
وده ينقي ماتلبس بحاله .
****
الوقت لول غير والوقت ذا غير
امنول كلا يروم الجماله .
****
واليوم لوبه خير تزقر به الطير
خذا الصغير من الكبير الوكاله .
****
اللي تمنى طيحت الذيب فالبير
لا يامن الحصني يضيع حلاله
****
لا جاك هرج بالقفا دون تبرير
خله مكانه بالقفا لا تساله
****
من فضل رب الكون ماجبت تقصير
ولاحب ظلم الناس بايات حاله .
****
مالي مع الكذاب خطه وتزوير
نفسي نقيه من علوم النذاله
****
ابيع واشري واحفظ الحق للغير
ولا حط بقلوب الوفين هاله
****
ولاسلط اعيوني قفاهم مناظير
ولا سوي اني فاهم كل حاله .
****
مومن بان الرزق مافيه تغيير
هذا جواب المحتفظ في سؤاله
****
مانلحق الشرهه ردي التعبير
ولا نصدر احكام بليا دلاله .
****
نفحم عقول عالقه بالدواوير
ما هو بضلم ..الا. بقول العداله
****
المطرقه تعدل حنو المسامير
والمنخل الطيب يرد النخاله .
****
يالله ياوالي عليك التدابير
ماغيرك احد مطلع ينشكاله
****
اجعلنا في كل خطوه تياسير
واجعلنا حظ مع اهل الشكاله
****
وجنب دروبي عن دروب المعاثير
اهل الردى والخبث واهل الضلاله
****
اللي موالفهم لحب الدنانير
وارباحهم في كل عام فساله
****
مشبب البشري