بقدومكم ديرة تبشر لديرة

غيث تنهض للرياض من أقادير
نوه نشأ وأمطر على نجد خيره
خيرة يعم وفي قدومه تباشير
يروي عطش سكان شبه الجزيرة
ينبت باثر ماطاه ورد ونواوير
ويزهر ورق صم الصحاري مسيره
سلطان أبوخالد زبون المعاسير
من ضحكته تنحل كل العسيره
صعباتها دايم تجي له تياسير
وجه سفير ومن وجيه سفيره
أهلاً هلاً يالنبل يالجود يالخير
بقدومكم ديره تبشر لديره
يامير يافرحة هل الدار يامير
بالطاير الميمون حزت مطيره
بحر الكرم يمنا الندا جمة البير
فعل المكارم ما تدور لغيره
للطيب في وجهك وصوف وتعابير
والحلم طبعك يانقي السريره
يابو العطا يامبدل الشر بالخير
ياللي يمينك بالمكارم شهيره
يا درعنا عن لافحات المعاصير
ياسيفنا عند اختلاف البصيره
يا السبع يا الضرغام ياالحيد يا الزير
يارفاس الهيجا نهار المغيره
ليا لتطم موجك تهد الطوابير
وليا زعلت أزعلت ناس كثيره
وليا ابتسمت أعطيت كل التفاسير
عن طيب قلب وطيب يمنى وسيره
ياكثر من حبوك لهفه وتقدير
حب وغلا وإخلاص شعب لاميره
جعل السلامة يابعيد المشاوير
دايم معك في كل درب تسيره
فرحان المطرفي