قصيدة للشاعر مناحي ابوشعرتين الشهراني

بديت ذكر الله قبل بدع الابيات
بسم الله الرحمن في مبتداها
سبحان من يعلم جميع الخفيات
علام ما تخفي الضماير وراها
ياباسط سبع وسبع سموات
ومدبر خلقه وهو في علاها
ويا مالك الدنيا ورب البريات
لك حكمة فيها وتعلم مداها
يا مشافي جروح القلوب العليلات
عليك تكلتها وبيدك شفاها
نشكي عليك اوضاعنا الداخليات
ما للدكاتر حيلة في دواها
البارحة ليلي هجوس وسهرات
والعين عيا نومها ما هناها
صار السهر للعين بالليل عادات
عيني جفت نومي ونومي جفاها
وهجوس قلبي تستلم فيه زامات
ما عاد يكفي يومها عن مساها
لها دواليب ودفاتر سجلات
والقلب تلعب به على ما طراها
ترى كل هاجوس سببه المحسات
كم من قلوب زود الله عناها
كل يعين في لياليه وجعات
وكل يسير بوزعته من عضاها
ما فيه خط الا بطلعه ونزلات
من اول الطرقه الى منتهاها
يا الله تعدلها ليا سار ميلات
ويا الله تساعدنا وترفع بلاها
من كثر ماله صار له شعب واصوات
والمال كم ناس رفع مستواها
كم خيب حطه بروس المنيفات
وكم طيب خلاها ينزل وطاها
ليته يخصص للوجيه المليحات
الطيبين اللي يشوق نباها
اللي يحبون العلوم الطريات
حتى راعي الحاجات يلقى قضاها
والله لا يغني الوجيه الكريهات
اهل الوجيه اللي قليل حياها
اهل الزهاده والنفوس الضعيفات
اللي كرمها ما تعدى لحاها
لا تساير الا اهل النفوس العزيزات
مثل الجبال اللي يذرى ذراها
شجعان في يوم يجي فيه فزعات
تحمي طوارفها وتلطم عداها
القرم ينفع الا نودي والقرابات
له رفقة تنفع كثير حلاها
يقدم لجيرانه المقدريات
وان جا على الجيران شي حماها
والا الردي دايم قليل المسرات
وده بنفسه دايم في خلاها
قليل مصلوح وكثير المضرات
ويا حيسفي يا العيشه اللي كلاها
رفيقك اللي ما يجي منه لذات
بع رفقته وامهل على من شراها
لو هو قريبك ما عليه الحسوفات
ترى رفقته تقطع ويقطع رشاها
هذا اللي اقدرنا له من الوصوفات
كل يقول علومه اللي لقاها
وباقي تواصيف عراض طويلات
لو كان تكتب تعبت من قراها
عندي تصيحه للقلوب الزكيات
نصيحة اطلب من الله ثناها
صم ارمضان وصل خمس الصلوات
والحجه اللي يعطي الله جزاها
والوالدين الطف لهم بالمروفات
ترى الام عند الله يقبل دعاها
لا تغرك الدنيا بضحك وسجات
واحذر تطيع النفس تتبع هواها
الاعمار بيد الله دقايق وساعات
اما عشا دنياك والا غداها
ويوم القيامه يبعث الله الامات
عند الحساب الكتب يكشف غطاها
كل حسابه له احسان وسيات
وكل على نياته اللي نواها
للجنه وللنار يمشون سيرات
من فاز بالجنه قطف من جناها
ومن سيق صوب النار يصلى اللهوبات
لا قربوا منها كلاهم سناها
يا ربنا تغفر لنا كل زلات
ونفوسنا للخير تكتب خطاها
عسى لنا في ما قف الخير قرات
ويا الله مسكنا وثايق عراها
وصلاة ربي عدة حروف الآيات
على شفيع الخلق في ملتقاها