للمقانيص هاوي

ياما بقلبي من خوافي وسجات
وياما طواني من غثا الهم طاوي
متى يجينا سهيل نجم المسرات
ويروح جو حرّه اليوم كاوي
لاجا تجينا بالليال البرادات
ويجينا منهو للمضاير يداوي
لا شفت زول الطير جتنا البشارات
قمنا نطارد ما حسبنا الشقاوي
قدر القماري بالحشا حي ما مات
هذا غرامي والعذر يا المخاوي
ياما حصلي لا لمحته متاهات
وياما حصلي من سببه البلاوي
مع رفقة اللي عاشقٍ للمروات
صدره رحيب وللمقانيص هاوي
صبّار ويبري للقلوب العليلات
وما هو من اللي لا نخيته يراوي
هذاك ولد العم راعي الجميلات
نفسه كريمة ما تخوف الخطاوي
في ما قعٍ بأعلى الزبار المنيفات
بأرضٍ خلا تسمع بها الذيب عاوي
واللي نصانا من الوجيه السفيرات
يلقى اللوازم جاهزة والقهاوي
والرمث شعلل والقصايد جزيلات
والبال ما طرّى علوم الرداوي
هذا هوى بالي وصفته بالأبيات
متى يجي ونشوف نجم المنادي
وصلاة ربي عد رمل الثويرات
على اللي نهجه للمسرات حاوي
صالح محمد الفالح