قصيدة للشاعر شالح بن حمد أبو ظهير

واليا زهمت الشعر في الحال ياتي
لا حان وقت الشعر مشاعري تبوح
تسوق جزل القاف من مفرداتي
اسرج خيول الشعر لاجيت باروح
واحيّر النقّاد في مخيلاتي
واغني الطاروق في صوت مبحوح
وارتب القيفان باحلى السماتي
وخصصت منها قاف بالنصح مشروح
شرحٍ تمثّل بالبيوت الثقاتي
ترى التواصي بين الاخوان مسموح
قد قالها محمد عليه الصلاتي
اسمع وصاتي قبل لاتطلع الروح
افهم كلامي زين تلقى النجاتي
افعل فعايل خير والباب مفتوح
واحذر دروب الشر والمنكراتي
ترى صلاتك في حياتك لها ضوح
تبعدك عن درب النكد والشقاتي
ولا تامن الدنيا ترى وقتك يروح
ولابد من يومٍ تذوق المماتي
عجّل بتوبه قبل لا تصير مكسوح
وتفوت منّك فرصة ما تفاتي
امك وابوك اللي لهم فضل ممنوح
في برهم وصى عظيم الصفاتي
إلزم دروب البِر من حيث ما تروح
تلقى السعد في دنيتك والهناتي
ولاتقطع الارحام لوكنت مجروح
ترى القطيعة من سواة العصاتي
هذي وصاتي كان للعلم مصلوح
اما بها ولا بلاش الوصاتي
وختامها صلوا على خير ممدوح
نبينا المرسول ذو المعجزاتي