"انشهد انه كان قرم" الشاعر ذيب العبيدي

لي صار مانعطي حقوق الخلايق

اكيد في حق الولي نقصنا زود


ولي صار مانفهم جميع الطرايق

ونقول مانعرف ومن دونه نذود


ويعز دون الحق غرس العوايق

اكثر مواقفنا عبث مالها فود


ماني بطربانً ولاني برايق

ولاني مشتاق على نفحت النود


اضحك وقلبي يستعر بالحرايق

وصلف الهبايب صدها كود في كود



من بين لا لايق ومن بين لايق

أخاف لا يلحق على النقد منقود



ياكثر من وقف ورد الوسايق

وياكثر من وقف وهو شبه مفقود



وياكثر من يشبه لورد الحدايق

يزهى به الرونق وهو فقعة اكبود



لكن سما فكري واحب الحقايق

واكره كلام الزور من كل نمرود


واخذ من الغر الفرايد شقايق

وابني مواقيفي على كل مشهود


واعيش بالواقع ولابغى الوهايق

والشجره الفرعاء ترى ساسها عود


يعني قبل جل الأمور الدقايق

احسب لمصدارك ولو مابه أورود


والصدق بالنيه وحفظ الوثايق

صدر الشموخ وفارقه نايف الطود


والطيب مفتاح القلوب الغلايق

لصادفك شح الليالي .. بها جود



والمجد في عرف الوجيه الطلايق

تنهل مع طيب العطاء كل قرهود


والغبن للرجال قطع العلايق

لا غايب يفقد ولاعنه منشود


والصعب وجه من وراك يتوايق

لا عز لك ماقف ولا شم بارود


وقت الرخاء ذيبً عزومً وشايق

وفي حزة الضيقات ماهو بماجود


واللى ملا قلبي وصار متضايق

مدح النشاما صار ملزوم بقيود


مادام حي مانعد الحقايق

نبغى ولانعطي ولا فيه مردود


وان مات تسمع للهروج الشفايق

انا اشهد انه كان قرمً ولد عود