في ليلة من ليالي الشتاء الباردة وحنا متقابلين دار مدار دوة ( منقلة ) الفحم .. وصوت معلق مباراة الدوري الانجليزي يلعلع بصوته بأحلى تعليق قال واحد من الشباب : الا ما تقولون لي متى ناديا توتنهام والارسنال يكونان بطلا للدوري الانجليزي ؟.. خيم الهدوء بالمكان والربع لا حس ولا خبر عندها قلت هذا حلم صعب تحقيقه في هذا الزمان !.. رد وقال ماكو شي مستحيل بالدوري وياما شفنا الأخير يفوز على المتصدر !.. قلت فوزهم هو المستحيل بعينه وعلمته !.. لان من وجهة نظري وبحكم متابعتي للدوري الانجليزي منذ عشرات السنين اقولك بكل ثقه ان أرادا لَبْس ثوب البطل عليهم بتغير استراجياتهما مدربانهما لانهم أعطا كل مايملكانه !.. ولعل سنة فوز لستر ستي ببطولة الدوري اكبر دليل على كلامي لان فرق المقدمة وابطال الدوري المعتادين فريقا مانشستر وتشلسي جاهم دروب بالمستوي بهذا الموسم !.. ولهذا أقول ياليت الآرسنال ينهي ارتباطه ( جيزت نصارى ) بآرسن فنغر ان أراد الفوز بالدوري لانه أعطى كل مايملك وأكاد اجزم ان ما عنده شي جديد يقدمه للارسنال لان العقلية التدريبية هاليومين اعلى من عقليته اللي توقفت منذ خمسة عشر سنه !.. وهذي سنة الحياة وكلامي ما هو انتقاص من مقدرتة التدريبية لانه مدرب عالمي وممكن ينجح مع فريق ثاني بس ياليته يجرب بعيد عنهم !.. وأما ماوريسيو بوكيتينو المدير الفني لنادي توتنهام فكثر الله خيرة بحسب إمكانيات فريقه لان طموح الادارة هو مركز متقدم بالدوري في ظل ميزانية محدودة متوفرة ببخل يعمل فيها منذ سنوات !.. وان أراد توتنهام بطولة الدوري فعلا الادارة فتح خزينة أموال النادي لاستقطاب النجوم وقبلهم البحث عن مدرب له اسم في عالم التدريب بدلا من بوكيتينو قليل الحيلة باغلب المباريات هذا من وجهة نظري وادري انها ماراح تعجب البعض بس دامك سالت فهذي إجابتي وانا متمسك فيها للأبد وسلامتكم .
