وش قصة الثار والانتقام بالاعلام العربي الرياضي ! .

صباحك ومساك خير عزيزي القارئ يارب امورك طيبة ؟ .. سيداتي انساتي سادتي ي اعزائي الكرام .. من يجففلي دموع وسادتي ويغمضلي دموعي .. من بعض الاعلام العربي المرئي والمسموع وايضا ما نتجاهل المقروء . اللي مادري لمتي وهم متخلفين ركب الاعلام العالمي بسنوات ضوئية؟ .. يا اخوان من خلال اعلامنا نسمع منهم اشياء عجيبة اللهم يا كافي ماكو مباراة رياضية تنلعب والا هم يطالبون بالثار لفريق على حساب فريق وهم يرددون ذاك الفريق هزم هذا الفريق شر هزيمة ومسح فيه الارض باخر لقاء بينهم .. واليوم من وجهة نظرهم يوم الفوز والثار ورد الاعتبار وتوليع وتسخين لنا من وراء الشاشة الصغيرة او خلال الصحف والمواقع الالكترونية .. يحسسونك ان احد الفريقين داش معركة من معارك الحرب العالمية او حده من سنوات حرب داحس والغبراء وان بايديهم سكاكين وعجاري راسها قار ماركة ودع اهلك يالحبيب .. وكل مبارة نسمع منهم ونقراء عن رد الاعتبار يعني ما عندهم غير هالسالفة دوخونا بها .. هذا غير الهذرة اللي مرات مالها داعي لانها تضيع علينا جماليات بعض المباريات .. وانا من خلال هذه المقالة اطالبهم بمراعاة احاسيس الجماهير اللي متسمره تبي تشوف مباراة تستمتع فيها مو تبي الكدر والتعاسة من وراء ناس كل همها الانتقام ورد الاعتبار .. مادري هم يعلقون علي مباريات كروية والا هم مراسلين حربين بخوذة وجعابات عسكرية مطارات ماء الله ليهينك يا اعلامنا يا عربي احترمونا وقدموا لنا الوصف المفيد وامسحوا من رؤوسكم رد الاعتبار والثار .. وقبل الختام خلوني اقولكم عن اطرف ما سمعت خلال الاسبوع الماضي وبالتحديد بمباراة يوفنتوس الايطالي ودورتموند الالماني ببطولة اندية .. عندما اطربنا واشجانا وارعد وازبد معلق المباراة وهو يذكرنا بان لليوفي ثار قديم عند الفريق الالماني من القرن الماضي .. (ياسلام عليك يا ابو التاريخ) وسلامتكم .
محمد خلف الشمري
كاتب رياضي كويتي