ليه مكبرين السالفة ؟!

طبعا (مدري ليش دايم احب لا سولفت ابدأ سوالفي بكلمة طبعا)، طبعا حنا مجتمع لنا خصوصيتنا اللي منها شغلات زينة ومنها شغلات داجة، وأهم خصوصية عندنا داجة أننا مجتمع يحب تكبير السوالف وتهويلها، أحيانا تكون شايف حادثة بنفسك وتلاقي واحد يسولف بالمجلس وقاعد يملح السالفة عشان يلفت نظر الجميع، ليش ما نتعود نكون بسيطين؟ (بدينا بالفلسفة اللي مال امها داعي)، ليش حتى السوالف الكبيرة ما نشوفها من زاوية واقعية وبسيطة، وأبسط مثال اللي صار في مباراة الاتحاد والهلال (حطيت اسم الاتحاد قبل الهلال عشان المباراة على أرض الاتحاد)، جبت هالمثال عشان ما ودي أجيب أمثلة تعور القلب، يعني اللي صار في المباراة من مطاقق بين ياسر والرهيب ورادوي ونور، يصير يوميا في حوارينا وكل ملاعب العالم، هذي الكورة، ويمكن هذي حلاوة الكورة، لاعبين كورة تحمسوا وبنص المباراة تهاوشوا ومن تنتهي المباراة ينتهي الموضوع، اللي صاير في المنتديات حق الناديين شي يخليك تحس أن صدرك ضايق من وضع مجتمعنا، شباب زي الورد وبعضهم يملك شهادات جامعية ودارسين برا شغالين نسف في بعض، يعني هالوقت اللي يضيع وقته هالشاب عشان يثبت أن نور ما سوى شي أو ياسر كان بريء لو قضاه في أنه يصمم موقع عن مساعدة الأطفال المرضى بالسرطان في السعودية ويحط تصميمات ويرسل إيميلات لكل التجار بأرقام حسابات الجمعيات الخيرية، كان حنا بألف مليون خير، فلتات الشباب في البرمجة أكثرهم ليش يصيرون هكر عشان بس يشوفون وش أنت مخزن بجهازك، اليوم حايشتني صخونه من عجاج البارح وحاسس أنها ماسكة معي مثاليات! عن اذنكم بروح ادقدق كورة بالحوش!