الزعل (مرفوع)!

بعض البقالات تستغرب ليش أول ما تدخل المحل تلاقي لوحة مكتوب عليها: الزعل مرفوع والدين ممنوع، وأكيد اللي حط كلمة مرفوع شاعر شعبي متخصص، عشان تجي على قافية ممنوع، الدين أو السلف في البقالات يخلي كثير من الناس يكحش مقاضي وهو بارد قلبه، لين يجي آخر الشهر ثم يلاقي نفسه مبنشر ومضطر يولع الفلشر، وحسب نوع الحارة اللي تكون فيها البقالة تكون النكبة أو المصلحة، يعني اذا البقالة حظها زين وكانت على طرف حارة سكانها ظروفهم المالية زينة؛ فالبقالة راح تكون ناجحة ومربحة، أما إذا كانت في حارة اهلها حالتهم زي حالتنا يا دوب الراتب يكفي أول اسبوع فراعي البقالة راح يعرضها للتقبيل بعد كم شهر، والسلف مشكلته مشكلة.. ويخلي العلاقات بين الاصدقاء متوترة (مانت هين يالسياسي)، وهالتوتر يجي من حالة الاحراج اللي تطلع بوجه المتسلف كل ما شاف رفيقه اللي تسلف منه، وبعض اللي يتسلفون وجيههم مغسولة بمرق، يعني يتسلف منك ويحلف أنه آخر الشهر تكون فلوسك عندك، ومن يطلع من عندك ما عاد تشوف وجهه سنين، وأول ما تدق عليه تبي فلوسك تطلع أنت اللي ما عندك صداقة ولا تقدر المعروف وقليل خاتمة، وانت كل ذنبك انك طلبت فلوسك، وكثير من حالات السلف انتهت بهوشة الطرفين ولا لها حل الا طلب حكم اجنبي ما عنده يمه ارحميني، ويمكن اللي قال الزعل مرفوع يقصد انه مرفوع بالركب والبقوس، الحين صار الواحد يسلف وهو عارف انه ما عاد يشوف فلوسه ولا وجه رفيقه!