تتن المتاعيس

طبعا ما يخفاكم إنه مو بس بالسعودية إلا بكل بلد عربي أن الضعيف ماكلها وين ما راح! وهو السبب اللي طلع موضة (الفشخرة) عندنا، يعني تزبرق حالك قد ما تقدر عشان اللي يشوفونك ما يعرفون إنك ضعيف ثم تاكلها مفلفلة، ويا قشر النكبة اللي فلفلها كثير يخليك ودك تدخل ثلجة في حلقك عشان يخف غليان الفلفل في جوفك (كنت عطار سابق)، قولوا آمين، الله يكفيكم شر النكبات المفلفلة، ويش كنا نقول؟ إيه صح، كنا نتكلم عن أن مجتمعنا إذا ما كنت فيه قوي أنس إن أمورك تسنع، وهذي الظاهرة لانتشرت قل على الدنيا السلام، نصير زي دول العالم اللي راعين القروش فيها ياكلون المفاليس، والغني يزود والفقير ينقص كنهم حيتان في بحر، تضحكني سوالف الضرائب الجمركية اللي حطيناها على التتن بزعم اننا راح نخلي المبتلين بالتدخين يبطلون عشان فرق ريالين أو خمسة ريال، ويش ما زدتوا رسوم التدخين؟ الضحايا هم الفقراء المبتلين بالتدخين وإلا الموردين إن ما زادت قروشهم ما راح تنقص، يا ناس لا تنظرون للمدخن انظروا لعياله اللي يصرف عليهم، ولا تضحكون علينا إن هالقرار يخص الغني والفقير، هالقرار يخص الفقير المسكين والا الغني تراه ما يشتري حتى دخانكم اللي مخصص للاستخدام الادمي الشرق اوسطي، الغني تجيه كراتين الدخان من برا، عارفين إن التدخين حرام في حرام، بس ترى منعه من الأساس أرحم من رفع الرسوم الجمركية عليه اللي راح ياخذها موردين التتن المخيس من ظهور المتاعيس!