مليار دب

منظمة الصحة العالمية زعلانة هاليومين على الناس بعد ما خلصت من تقرير لها مختص بمعدلات السمنة بين البشر.. ويوم خلصت ضاق صدرها.. طلع لها مليار آدمي دب.. مليار واحد يلهط عشاء إخوانه.. يمكن خايف لو زاد العدد أكثر يسبب إن الأكل بالكرة الأرضية يخلص.. تعرفون الدب لازم ياكل.. لازم يحرك حنوكه.. وهذا اللي خرع منظمة الصحة العالمية.. يقولون هالتقرير مغص بطن ريس المنظمة وقط الأوراق اللي على مكتبه من الزعل.. وأنا رفعت يدي عشان انشد ريس المنظمة.. يا ريس.. الناس تقول عني سمين مع إن الوالدة تقول لي ما عليك منهم وأنا أمك غزال شحليلك.. وشلون أعرف أني سمين.. جاوبني الريس الله يحفظه وراح أقول لكم وش قال بالعربي الفصيح وانتم ترجموها للعامية عشان يضبط الفهم..(يعتبر الشخص سمينا عندما يكون مؤشر قسمة وزنه (بالكيلوجرامات) على مربع طوله (بالمتر) أكبر من 30. ويكون وزنه زائدا عندما يكون المؤشر بين (25 و30).. يعني إذا وزنك مية كيلو وطولك مترين.. 100 تقسيم أربعة (2 ضرب 2) يكون الناتج 25 يعني سمين.. ويقولون إن مرض السكر ما له من يعده.. شغال سدح في العالم الله لا يبلانا ويكفينا الشر (يا ناس لا احد يجيب طاري مرض وربي على طول أروح أفحص أحس أنه فيني).. الله يقلع منظمة الصحة ويقلع سوالفهم.. حنا ناقصين تخريع.. ياخي ما فيه منظمة (يا رجال مالك عن المقسوم) كل على كيفك.. نبي شي يساعدنا نفلها وحنا مرتاحين.. أعوذ بالله ما فيه وناسه بدون تخريع.