ياناس امنعوا (الرشاش)!

هالمرة بسوي حالي فهمان، بس مو فهمان اللي في مجلة ماجد، وابحث عن فضولي، الله يذكره بالخير فضولي، كان يبهدلنا ندور عليه بكل صفحات المجلة، وهالمجلة كان لها فضل علي بأول حياتي،خلتني اعرف من وانا بزر ان حظي من جنب القدة مهما حاولت، ياكثر ما شاركت بمسابقات مجلة ماجد ولاعمري شفت اسمي، ماعليش ادوشتكم معاي بذكريات الطفولة، وودي احكي لكم قصتي مع ادمان قرانديزر وسندباد بس ما راح يكون فيه وقت خصوصا اني لاسولفت انسى نفسي وامسك خط، اللي كنت ابي أقوله،ان أي شخص يفكر بالجرايم اللي تصير عندنا من قتل ومن إرهاب، يلاقي أن الرشاش هو السلاح الرئيسي، واللي لو ما كان موجود كان هالمجرمين ما تمكنوا من قتل اوادم كثير، ترى ما راح ترتاحون وتريحونا معكم ان ماقطعتم عرق المشكلة من اساسه وسيحتم دمه، ترى يا إخوان اللي يستخدم المسدس بالقتل ولايستخدم رشاش تكون نسبة فشله أكبر ،لأن الرشاش الله يقلعه لامليت الشرشور حقه تقوم تطلق لين تصيب، يعني مو زي المسدس تطلق طلقة ثم تبلش بعمرك، اقدر أحلف أن من أكبر الأسباب اللي راح تقلل نسبة الجريمة وراح تهجد من الإرهاب هي خطوة منع الرشاش ومنع امتلاكه بين المواطنين،لاحد يقول تصريح الرشاش اقتناء مو حمل، لان اللي مصرحه عشان يقتنيه لاقفلت معاه راح يحمله ويقتل فيه، اللي قتل كم واحد باستراحه كان برشاش، والمريض النفسي اللي قتل استخدم رشاش، واحسبوا من عشرات السنين وراح تلاقون ان كل جرايم القتل استخدم فيها الرشاش، وسلامتكم!