ليلك حالك

ليلك حالك
اطلعي قلبي على سلم روحي
وانا ها اعمل حزني رحالك
بعصر لك جسمي من النور المتصفي
وانت بتحبي البعد وبتدوسي فى أوحالك
تدي للكل عينيك.. إيديك..
والعسل الدايب في شفايفك
ولعندي بتبدئي ترحالك
اشمعنى
ارمي صباح الخير
أو حتى عواف
ازيك
انا بسأل ورقي .. وحروفي .. وندعة ندى بتملس فوق خوفي
على حالك
ده انا من مجاذيبك.. روحي على كفي ولا تكفى ورايحالك
أنا فاطم قلبي على شفايفك
والحزن اللي مسوي النخل
بيسألني عن كحل عينيك
مكسوف منك
مع انك تعرفي كحالك
أنا هو يا جنيه يا بنت الناس الناس
ليه بتنسي القمر اللي من النجمة بيصحالك
كدهه خليك براحتك.. برحيلك برحالك
أنا ها فضل من عشاقك
والسهم الراشق في جراحي بيمسي على الفجر
اللى عملته جبلين وقعدت ما بينهم
روحي مسامحالك
استاهل عشقك.. السم الدايب في عضايا
هو اللي مخليني اشهِّد ناسك
هو اللي مخليني في عشقك ناسك
كان نفسي أكون وناسك
وابدأ من تاني اشوفك
من تاني
يا بنت جراحي
وصرة أحزاني
في ليلي الحالك