حطوها بسجن بس عطوها حقها

وضع المرأة ان بغيت تقول عنه تمام، يجي تمام وان بغيت تقول عنه رايح فيها تقدر تقول رايح فيها وانت متطمن، ما نبي ندخل بسوالف طويلة عريضة تزعل ناس وترضي ناس، خصوصا ان هالايام الناس متولمة للزعل والمناطح. فيه ناس سبحان اللّه كن مهمتهم بالحياة مهاوش خلق ومعاتبهم على الطالعة والنازلة.
اعوذ باللّه ان كنت اطالب بشي ضد الدين، ولافيه انسان عاقل يطالب بشغلات زي كذا، بس ليه دايم كل الامور تطلع الخسرانة فيها الحرمة؟ كننا فاهمين ان حقوق المرأة عندنا انها تاكل وتشرب وتنثبر بالبيت. واللّه يا اخوان ان فيه حريم افضل من رجال شنباتهم واصلة اذانهم، يا كم فيه حرمة انحرمت من ميراث ابوها لأن اخوها طماع وسرسري اخذ زوجته بدالها وخلاها تعطيه توكيل عام عشان يلهط قروشها! يا كم فيه زوج عاطل باطل وسكير تنكد عليه زوجته، ولو رفعت صوتها من القهر راح وفصلها من الوظيفة وخلاها مثله عاطله. ترى مشكلة اكثر اللي يسولفون عن حقوق المرأة انهم رجال ما حركت الحرمة شعرة من راسه ولا جاب خبرها بس يبي يطلع يشخص.
هايطوا على كيفكم، امنعوا على كيفكم، بس خافوا اللّه بارواح ما لها لا حيل ولا قوة غير انها تنام وتصحى وتتمنى من ربي انه يفكها من ظلمكم. لو شفتوا حالات الطلاق وراجعتوها زين تلاقون اكثر هالحالات المرأة فيها مظلومة وبعضهن لها سنين ما جتها النفقة وزوجها يتبطح مع زوجته الثانية!