الحربي: لا توجد فنانات سعوديات.. و«شر النفوس» ممل

شاهد عيان من الشارع العام، على الأعمال الرمضانية ونجومها.. له وجهة نظره تجاه ماتابع من الأعمال وله رأيه الخاص بالطبع.. ومع بدر العبيد دار الحديث التالي:
بعد شهر من العرض الرمضاني وش الأعمال اللي كنت تتابعها؟
«طاش ماطاش» و«بيني وبينك» و«رايات الحق» و«شر النفوس».
ليش اخترت هذي الأعمال بالذات؟
عامل التوقيت كان له دور وأحس إن عندهم شي بيقدمونه في رمضان.
وانطباعك النهائي كان وش؟
«طاش» أحسه حلقة فوق وحلقة تحت و«بيني وبينك» فيه شي خطأ و«شر النفوس» كان مملا.
طيب من أكثر فنان شدك؟
ما حد شدني لدرجة أني أكون منبهر به، لأن ما فيه أحد قدر يتفوق على نفسه.
طيب أعمالنا السعودية وش تسمع عنها؟
أسمع أن «سكتم بكتم» مكسر الدنيا، بس للأسف ماشفته زين.
وليش ما تابعته؟
فيه ممثلين ما أحبهم يشاركون فيه.
مثل من؟!
رقية وسعاد علي ما أطيقهم على الشاشة.
طيب الأعمال السورية وش سمعت عنها هي الثانية؟
ما عندهم إلا «باب الحارة» أزعجونا «إم بي سي» فيه كل سنة مرة يموت بطل ومرة يعيش وش السالفة بس؟!
من الفنان السعودي المميز عندك؟
ناصر القصبي وعبدالله السدحان.
كل الفنانين الموجودين مو عاجبينك؟
أنت سألتني مين المميز وأنا علمتك.
لو كنت منتجا من بتختار من الممثلين؟
بأختار عبدالله السدحان وناصر القصبي وعبلة كامل ويحيى الفخراني.
ليش ما يكونون الأبطال كلهم من السعودية؟
للأسف ما فيه فنانات عندنا، ما فيه إلا ريم عبدالله وأداؤها ضعيف.
يعني تنكر أنها نجمة؟!
ياخي ما تعرف تمثل بس موجودة في المسلسلات كذا.
من يعجبك من الممثلين الخليجيين؟
حياة الفهد وسعاد عبدالله ونايف الراشد وعبدالعزيز جاسم.
شكلك تحب التراجيديا صح؟!
إيه، وأتابع كثير من أعمال الفنانين اللي أعتبرهم عرابي الدراما الخليجية في الفترة الحالية.