معركة مقاضي رمضان

بس ودي اعرف ليش حنا كل رمضان ما نتقضى الا آخر ليلة، ومعارك ومضارب على الاسواق ودنا نشتري كل شي، يوم توصل البيت ورجولك ودك تنقعهم بثلج من وجع المشي ما تترك المدام بحالك لان حضرتها عندها الفين عذر انها ما تشيل المقاضي والا انت يا مسكين مالك الا عذر واحد وهو اذا معاك تقرير طبي من المستشفى يقول ان فيك دسك ومانعك الطبيب لا تشيل شي، لو الود ودي كان حطيت مرور داخل الاسواق الكبيرة ينظمون سير سلات المقاضي والبزارين اللي يطامرون يمين ويسار وكل شوي متهاوشة عايلتين مع بعض بسبب البزارين، لا طالعت الناس وهي تطامر فوق بعض وتراكض تشري مقاضي رمضان يطري عليك الفيلم الأمريكي اللي يتكلم عن نهاية العالم يوم ركبوا سفن فضائية هاجين من الارض، لا شفت زحمة اسواقنا تطري عليك على طول الزحمة اللي مسوينها سكان الكرة الارضية يوم كان يبون يركبون ويهجون قبل الارض لا تدمر، من بعد العصر تعال وتفرج على انواع التهاويل والاحداث الغريبة اللي ما يسويها غير ربعنا، ادري بعضكم يقول وش تبينا نسوي يا مهبول كل الناس تشتري مقاضي لرمضان مو بس حنا، طبعا كل الناس تشتري بس مو زينا ومو زي الهبال اللي يصير بالاسواق عندنا، كثير من الناس يتقضى بس مقاضي الأسبوع الاول ثم لاركد الرمي ونزلت الاسعار وخفت الزحمة راح يتقضى باقي الشهر، اشوى ان قوقل ما يشوف اللي يصير بالاسواق والا كان علوم!