تعذيب البزارين (1-2)

أنا مدري شلون الواحد عنده قلب يضرب طفل صغير (ياروحي .. يالحنون).. ياخي كيف يتحمل الإنسان يشوف طفل يبكي؟.. تابعت قضية الطفلة رهف.. وأنا بحكم معرفتي بالمجتمع السعودي أعرف أن زوجة الأب ميه من تحت تبن، إلا من رحم ربي.. وأعرف أن الأب اللي يتطمن لزوجة ثانية ترعى عياله من زوجة غيرها.. هذا إنسان ما فهم الحياة زين.. وتلاقي نمو المخ عنده بطيء.. قصة رهف وغيرها من قصص الأطفال اللي يتعذبون فتحت باب مسكر من زمان عن هذي المشاكل اللي ماليه البلد.. وكان لي معرفة بشخص مهتم بهالامور.. ويحاول مع أصحاب الشأن بوضع هاتف للأطفال يتصلون عليه إذا جاهم مضايقة من الأهل.. طيب وإذا الأهل جاهم مضايقة من ورعهم.. من يتصلون عليه؟؟ بعض البزارين.. كنه مركب بطارية فيراري بين هالكنبات.. البيت الجديد خلال شهر يخليه لك يحتاج ترميم كامل.. يمتد تأثيره حتى يوصل تمديدات الكهرب في البيت.. تلاقي كل يوم شايلين أمه منصرعة من مقالبه الكهربائية في أهله.. وإذا ما تصرفت معه.. ما يمر سنتين إلا متسبب بوفاة واحد من أهله.. تلاقيه يفر الدريكسون من يد أبوه وهو يمشي ميه وستين.. ورع بمواصفات جني.. بس مهما كان.. ضرب الأطفال أو ضرب الزوجات أو أي ضرب عمل غير إنساني .. وليتنا لحقنا على الأيام هذي يوم كنا صغار.. وربي غير تلاقي أكثر المدرسين اللي درسونا مساجين.