شوفوها مع «ضو النهار»

بالبلدي

•• الله سبحانه أكرم الكامل وقراها وجعلها بين مكة المكرمة والمدينة المنورة، اللي يبي عمرة واللي يبي يحج ما يرده غير موتره، وكلها ساعة وهو في بطن مكة، وإن كان يبي زيارة للمدينة ما يتعدى الساعة والنص إلا وهو مسلم على النبي صلى الله عليه وسلم.
•• والحكومة ما قصرت، جابت كل الدواير من جامعة ومستشفى ومدارس وعسكر، لكن البلا في درب الكامل ولفاته، وكم ناس من ربعنا ماتوا بسبب هالطريق اللي الله يكفينا شره.
•• قدمنا معاريض على المسؤولين ولا شفنا شيء غير المواعيد ورى المواعيد.
•• والطريق يهون ليا شفت الحلال له لجة يدور الماء، والله إنا نشري الوايت الدينة بخمسين والعايدي بمية ريال، ونوب ما نلقى من يجيب لنا الماء.
•• حطوا لنا بيار لكنها ما تقضي اللزوم، أٌما إنها يابسة من الظما وأللا مغطاة وألا ماها دبج ما ينحي مع الحلوق.
•• يقولون التحلية تبي تجينا وتاصل كل بيت، لكني أخاف إنهم ما يصدقون، وتلحق مواعيد الطريق.
•• واللي يبي يتوكد من كلامي يزور الكامل ويشوفها مع ضو النهار، ترى ضيف العشا مشني لو عند أهله، وتراها ما هي بعيد، إليا وصل عسفان يفرق من عند ريع الثنية ويروح شرق متشامل، ولا يحول عن السفلت لايمين ولا يسار لان يطب الكامل.
* عضو المجلس البلدي بالكامل