صجّة نادي القرن!

ربعنا ما يصدقون على الله يلقون شي يتطاقون عليه، صار عشر أيام مطاق وطقيق ومكافخ وكفيخ بين مؤيد ومعارض، ورق الجرايد امتلا وشاشات التلفزيون متروسة ترس بناس تهايط وتدافع وتحالف في هالموضوع اللي مدري وش سنعه، ناس تقول وش حارق رز الناس المعارضة حتى لو اننا لاهطين اللقب وزارفينه بطريقتنا الخاصة اللي ما تخر الماء، وحنا يومن فاز خويهم من نفس المكان اللي عطانا اللقب ما قلنا شي ومشينا لهم السالفة وهالحين هم معيين يمشون سالفتنا بس نحاسة فينا، وناس يقولون حنا ما نحب اللفلفة والمكاذب على خلق الله، واللي يبي ياخذ لقب لازم ياخذه بجدارة ولا يصجنا انا سويت وانا فعلت، وهالشي ترى يا اخوان ما هو غريب على مجتمعنا، الا الغريب لو ما صار هالمناطح والهواش، حتى في بيوتنا، ومع بزارينا، ما فيه حل وسط، وش خلانا ناخذ الاول في بطولة كاس العالم للسكر والضغط غير قوة حقاتنا وحبنا للمناطح على غير سنع وبدون فايدة، المشكلة كل الطرفين المتناطحين ما فيهم ولا واحد مستفيد، وش يضرنا لو بلعنا العافية ولا صجينا خلق الله وصارت حتى القنوات الخارجية تلعب علينا وتكسب من ورانا ملايين الريالات عشاننا مقفلين روسنا وشغالين مناطح في بعض، ولا بغيت اي قناة تنجح لا تحط خطة تسويقية ولا تتعب نفسك، سو كم خطة واضمن دخل بالملايين، جب كم سعودي وخلهم يتقاضبون الحلوق وعلى طول يجيك المعلنين والمشاهدين السعوديين يركضون ركض، حط برنامج على الهواء وراح يدق عليك كم سعودي يستهبلون وهالاستهبال راح يخلي قناتك تشعلل وهات يا مسجات وهات ياتصالات وحط بالجيب!