معزوم زواج!

كلنا توصلنا دعوات زواجات من اخويانا وربعنا وعسى الله يتمم لهم كلهم بالخير.. لكن «على قولة المسلسلات» ما قد لعب الفار في عب واحد فيكم مرة من المرات وهو يقرا دعوة عرس جاية من واحد صديقه.. وبقت السالفة تقرقع في باله لكن ما يمديه يقول شي لأن البرستيج مايسمح، خصوصا خويك اللي تمون عليه اذا اعرس أو خطب تلاقيه قلب رسمي معاك ومسوي فيها مقطع أم المسؤوليات وموب فاضي لمزح عادي حتى.. مابالك وانت ودك تقوله «سالفة زواجك ذي بكبرها عجزت استوعبها»!
الحالات اللي زي هذي طبعا.. يا يكون واحد من اخوياك طول عمره محبط وماخذ موقف من السالفة هذي، والا يكون واحد مسكين في حاله اكثر من اللزوم وشخصيته ضعيفة واذا قلت له تزوج قال لك عساني اشيل نفسي الحين تبيني اشيل هم وحدة ثانية معاي؟.. في نوع يجيك متزوج وخالص وماعنده سيرة غير «يارجال وشو له المصاريف والتكاليف.. انا اصلا ابي اربي عيالي.. والله يخلي لي امهم».. لما واحد منهم يعزمك فجأة على فرحه تستغرب.. هذا غير النوع اللي يشكي لك طول عمره من بيره المادي وغطاه وقلة الحيلة.. وفجأة طاق لك ذاك الموتر بمبلغ كبير، وحاجز اغلى قاعة في البلد.. وقتها بتقرقع في بالك الكلمة «معليش يالحبيب.. انت عزمتنا على حفل وعشا اوكي.. بس متأكد انو محد عازمك انت على زواج؟».