شباب الفلة وطلعات الاستهبال

معليش يا بعض الشباب.. اعتبروني بطيء استيعاب، «هذا اللي يسمونه شاعر بالفطرة، أنا عندي مشكلة في هالعبارات اللي يقولونها ربعنا.. يجيك الواحد ماشي مليون «فاتك نص عمرك».. ودك تقوله: «طيب وخر خلني أعيش النص الثاني»، بس ينشب لك.. والله فاتك؟ طيب وش اللي فاتني يالحبيب؟ وتكون منتظر العبارة العظيمة اللي راح تغير وجه التاريخ، ويقولها لك بكل ثقة، «والله طلعنا التحلية.. وأنواع الفلة والاستهبال!» هو قالها والا ما قالها بتلاقيه متشقق من الحماس.. وانت بتفكر وقتها «وش هالنص عمر السامج اللي راح هدر عشاني ما طلعت أفلها واستهبل معاهم»!
الفلة وعرفنا أنها الانبساط.. لكن الاستهبال حسب معرفتي المتواضعة هو «طلب الهبل».. وحسب معرفة اخونا في الله.. هو اقصى شي ممكن الواحد يسويه عشان يستمتع بوقته في شارع التحلية.. ويشمل تصرفات مدري وش تبي من الحياة مثلا واحد يطلع راسه من فتحة السيارة ويرقص، أو واحد يطلع من الدريشة ويصارخ ويذب على خليقة الله، ولو تسمع صوت الدي جي راح تشك أن قناة ام تي في فاتحين فرع في سيارة شاب سعودي.. وما يمنع من شوية حركات مثل النزول للشارع ومضايقة الناس والضحك الغريب بصوت عالي. طبعا هذا غير حركات الكابتن اللي يسوق وتلاقيه يهز الموتر عند الاشارات وينطل ويقاوم العالم، «مفردات ما يبي لها ترجمة يعني لا حد يسوي لي فيها سويسري».. والمهم أن كل هالأشياء مجتمعة تدخل في معنى «الاستهبال»، وقد ما يبدع الواحد فيها نقدر نقول عليه «أهبل».. لكن اللي مو مفهوم في السالفة كلها.. وين المتعة في كل هذا؟! أو بالأصح وش اللي فاتني بالضبط؟!