شارع الذهب يا أمانة جدة

بالبلدي الفصيح

آلو آلو ياسيدي كيف حالك انت فين سامعه بزوره يزعقوا ويصفروا ويلعبوا كوره؟؟!! . ايوه ياستي انا في شارع الذهب اللي قفلوه من شهرين ولسه الحبايب يشاوروا عقلهم يفتحوه والا لا، صار الشارع زايط لايط صار معسكر لمنتخب البزورة اللي جايين من حارة الهنداوية ومن حارة بره جالسين يلفلفوا بالدراجات واللي يتجاكروا بالدبابات هدا غير اللي بيلعبوا كوره وحاله مايعلم فيها الا الله، شي يحزن هدا اللي جالس بيصير في شارع الذهب اقدم شارع تجاري واقتصادي في قلب جدة، هدا الشارع يعتبر من اهم شوارع منطقة البلد، يبدأ من الاشارة اللي عند شركة عبدالله هاشم وينتهي عند دوار البيعة وهدا الشارع فيه مجموعة كبيرة من الفنادق والمحلات والاسواق والمكاتب التجارية اللي بتتعامل مع دول العالم بخصوص شغلهم وتجارتهم شي يجيب الهم والغم هدا اللي جالس بيصير في شارع الذهب او شارع باب شريف التجاري زي ما بيسموه اغلب سكان جده، شارع تجاري بحت (حلو بحت دي زي الكتاب الكبار) المهم ياحبايب هدا الشارع له اكتر من شهرين وهو مبهدل اخر بهدله يعني بالبلدي كده بعد ما سفلتوه ورصفوه وخلوه خط واحد (رايح) قاموا الحبايب حقون امانة جدة والحبايب اللي ماسكين بلدية المنطقة التاريخية (قفلوه) وصارت الشوارع اللي حوالينوا فوضى من ناحية مسجد البخاري وناحية عمارة بلحمر زحمة سيارات ياكترها اللي رايح ينصدم في اللي جي واللي جي ينصدم في اللي رايح، والمصيبة انه شارع الذهب ده مقفول له دحين اكتر من شهرين زي ما قولتلكم واصحاب المحلات التجارية والدكاكين فلسوا وطفروا من المصيبة دي اللي جات عليهم بالله عليكم ياحبايبنا يللي في امانة جدة عندكم الشجاعة انكم تعوضوا اصحاب هادي الدكاكين والمحلات التجارية عن خسايرهم اللي بتقدر بملايين الريالات وكله بسبب كم طوبة مبنية يسموها بوابة تاريخية لا راحت ولا جات، لا واللي يموت من الضحك ويخلي الواحد ينسدح على قفاه من كتر الكركره انه المرور بيقول ما حنفتح الشارع الا لما يشيلوا البوابه التاريخية والحبايب اللي في بلدية جدة التاريخية راسها الف سيف انها ما تشيل البوابة التاريخية قلبها على البوابة ونسيت الحرايق اللي حصلت لبيوت عمرها اكتر من 200 سنة في المنطقة التاريخة راحت فطيس بسبب اهمالهم، يعني بالبلدي يا اصحاب المحلات التجارية بلطوا البحر واعلى مافخيلكم اركبوه ما حنشيل البوابة التاريخية، يا امانة جدة ياكتر الميادين والكباري اللي هدمتوها عشان تكتمل مشاريعكم جات على البوابة التاريخية اللي جالسه زي الخازوق في شارع الذهب اهدموها وافتحوا الشارع وخلوا اصحاب المحلات يشوفوا حالهم ورزقهم وزي ما قالوا اهل اول قطع الرقاب ولا قطع الارزاق وارحموا من في الارض يرحمكم من في السماء وعيشوا كتييير تشوفوا كتيييييير .
هرجة/ اتمنى من اصحاب المحلات التجارية انها تقدم شكوى للجهات المختصة للمتسبب في خسايرهم اللي تقدر بملايين الريالات.
مثل حجازي / اصبر على جار السوء يايموت ياتجي مصيبة تاخدو