ليالينا الرمادية

يا كثر ما تسبق الخطوه على .. النيه
لا صار الأذهان مشغوله عن خطاها
ويا كثر ما للفقير .. أحلام ورديه
ويعيش باشياء عمره ما تمناها
وحنا فقارى ليالينا رماديه
حرصا على أحلامنا .. ياما سهرناها
آلامنا .. آلام مكشوفه ومخفيه
ياكم من الناس والايام .. عشناها
آلام الأجساد .. تبقى آلام وقتيه
حتى إذا طولت .. نكبر وننساها
وآلام الارواح .. لو طال الزمن حيه
تقرأ مع إحساسنا .. لا من كتبناها
والشاعر اللي علاقاته حميميه
الملهمه لو تحاول تنتظر جاها
لكنها معه .. مثل الشمس والفيه
تطول لا مال .. وأزرى لا يتعداها
ولأن العلاقات عنده ذات أهميه
راح وسأل غيمة الأفراح عن .. ماها
يالملهمه شاعرك عنده .. خصوصيه
تبين داخل عيونه .. كل ما أخفاها
الشعر عنده ما هو حاجه ضروريه
لا أعجب ببيتين .. لحنها وغناها
ويعيب فالشخص عيش الانطوائيه
ويحب في كلمة الانسان معناها
في نظرته أغلب الأشياء .. عكسيه
وما كل من دور الحاجه بيلقاها
وكل الحقائق تجي ما هي حقيقيه
ولا كل حاجه تجي على مسماها
حتى القصايد من حروفٍ هجائيه
وقصايد المدح مدري كيف نقراها