غلطة عمر

من حط نفسه بموقف ما يناسب له
يصبر على كل ماطاله ويرضابه
لو إن كبده من اللي صار مند بله
لكن من طيب ساسه ماسك أعصابه
تحمل الوضع من طيبه ومن نبله
وخلى قليل المعرفه يفتل اشنابه
أنا ادري أنه جهول وقاصر شبله
لاعودت للحجج والرأي ومجابه
ومشيتها قلت هف مقيط مع حبله
والله يعوض على من يرخص آدابه
من دور العدل عند العالم الخبله
والله ليتعب ويفنا العمر ماجابه
لكن غلطة عمر تكفيه وتهبله
عن غيرها إن كان له عقل يتقدابه
الوضع أضنه اله مده مرتب له
خلف الكواليس شي مادرينابه
حلفت راعي الدسايس ماتقرب له
لو كان لاشافني بين لي أنيابه
في ذمتي ماشغل فكري ولا احسب له
اعز نفسي ولا أوقف على بابه
فجوج الله اوساع لو أعيش في عبله
أخير من قرب محتاله ونصابه
يالله ياللي بنيت لعبدك القبله
وحميتها من (نهيم) الفيل وأصحابه
ومنشي سحاب تراكم ونهمر وبله
يحيي هشيم شديد الوقت قد صابه
انصر هل الحق واخذل من قفل سبله
وتعيننا فوق قاسي الوقت وأتعابه