قسمة ونصيب

والله اني كنت عارف آخرة ذيك الرواية
حسني قلبي وانا ادري لا قرصني ما يخيب
لا تشيلي هم عادي قلت لك من البداية
القمر لا شع نوره عاد شوقه للمغيب
في أمان الجرح روحي لو على قربك دفاية
بعض لوعات البراد أبرك من احساس اللهيب
شرهتك لا قلت لحظة واسمعيني للنهاية
هالطريق اللي جمعنا دام ودى ما يجيب
تحسبيني لا رحلتي بطلبك عطف ورعاية
صدقيني الموت أرحم من جروحٍ ما تطيب
أصعب الأحزان دمعة نزفها بين الحنايا
ليه يمسحها البعيد وما درى عنها قريب
ما ني بأول شخص علم خله فنون الرماية
جارت الدنيا عليه وصار من خله صويب
كنت ناوي يوم أحبك والله أعلم بالنوايا
اشتري لرضاك فرحه عن شفاتك ما تغيب
للأسف حلمي تبعثر وانكشف وجه المرآيا
الحبيب اللي عشقته صار له غيري حبيب
شققي كل الرسايل وادفني بعض الهدايا
ليه ابقى في حياتك دامني فيها غريب
واحسبي كلمة احبك للاسف غلطة شفايا
انتهيتي من حياتي وكل شي قسمة ونصيب