مواقف الطيب

من صاحبي زلته لاجات امشيها
اما على حشمته والآ لشيبانه
اطا عليها ولا كني بموحيها
واصد عنها وأبرر زلة لسانه
أحسب عواقيبها والله يعديها
من خوف لا يدري الحاقد وشيطانه
ومواقف الطيب بأذكرها وأبديها
وجزايل المدح يبشر والله بسمانه
واقول هذا علوم الطيب يشريها
من خلقته تجري الشيمه بشريانه
قرم شجاع عيون الضد يعميها
ومعنز الطيب من خاله وعمانه
وأطلب لعل وعسى ما عاد يثنيها
وليا ثناها تركته لأجل شيبانه
ماني بمنهو يبيها غير يخطيها
اللي يضيع حصيله وسط دخانه
معود النفس للعليا وأعليها
جمل جمل ما التفت في هبد حيرانه
تجارب سنين بذ الناس خافيها
ووصاة عود رجح بالطيب ميزانه
عود دروب المراجل فايز فيها
ابوي عون الرفاقه ريف ضيفانه
وعلاقته مع رجال العرف بانيها
وروس النشاما تحصلها بديوانه
ابوي لا كبرت القالات راعيها
تشهد زحول العرب لا جات بلشانه
شهادة الناس قاصيها ودانيها
تشهد بفعله ويثبتها ببرهانه
كريم بالجاه والمدات يعطيها
يرخص حلاله ليا منه بدا شانه
يقول زلة رفيقك لا تجازيها
والطيب مكسب وغيره صك بيبانه
وانا وصاته بعون الله ماخليها
وامشي على درب ابوي ودرب جدانه
أبغي لمن العرب عدت حسانيها
تعدني والرجا في الرب سبحانه