ضحكة الوقت

لا تغرك ضحكة الوقت والدنيا متاع
وانتبه من غفلة النفس وإغراء الشموع
والله لتنّدم على العمر وسنين الضياع
لا تكاثر طول عمرك ترى كنّه أسبوع
حاول اتروّض هوى النفس نفسك لا تطاع
ودايمٍ خلّك على قسمة الله لك قنوع
ومن تبع نفسه على كل ما تبغاه ضاع
وحس بالنيران بعدين في حدب الضلوع
وكل يوم يروح بالعمر ما فيه ارتجاع
مخبل اللي غرّه الوقت لو إنه بتوع
وانتبه من خوة اللاش قدر المستطاع
ورافق اللي يرفع الراس في كل الطبوع
الشريف اللي مع الوقت ما يلبس قناع
عايشٍ في وجه واحد وينطح له جموع
وسمعة الرجّال بالعمر تشرى ما تباع
معتني فيها ولا باعها لو مات جوع
واحفظ لسانك وفكّر قبل هرجك يذاع
والكلام اللي بلا وزن يطلع له فروع
وأحسن من الهرج كله بحسن الاستماع
من حكيمٍ شاف بالناس تسعين ألف نوع
يا الله إنك تغفر الذّنب قبل الانقطاع
وإن وقف يومي لهي بين سجدات وركوع